[3. Juli 1696] VII. congregatio 3. Julii. [fol. 133r] Supplicant amici pie defuncti von Heiligenthal, quatenus facultas causam mortis velit specificare, sed facultas responsum dare scriptotenus, cum non teneatur nisi regimen id mandaverit, oretenus ipsis respondendum, ejusmodi mortem a variis posse provenire causis, quod et feci.

Hic ulterius fuit conclusum circa chyrurgum Gerwig ratione poenae. Variae fuerunt opiniones, plurima tamen pars condemnavit ipsum ad 12 imper. in specie, quos tamen in parva moneta sub comminatione gravioris poenae, si adhuc semel in consimili causa fuerit deprehensus, coactus fuit dare.

Praeterea praelectus fuit libellus alicujus aurigae Hungariae per imperatorem et regimen pro informatione missus, in quo supplicans petiit licentiam introducendi et vendendi contra privilegia dom. Ambrosii acidulas Roitschenses potissimum ex hoc capite, quod verus sit inventor eorundem et quod suam sanitatem perdiderit in servitio bellico. Respondet facultas, quod ille inventor, cum ante centum annos jam fuerint notae, non possit esse, an vero se in servitio imperatoris destruxerit, nullam habere informationem. Ceterum periculosum esse, confidere homini acidulos, qui hic possessionatus non est ob errores plurimos emergentes.

Patroni pharmacopoeae in Mistelbach respondent ad mandatum ratione examinis provisoris, quod eorum provisor proxime sit iturus in religionem,16 sequentem autem examini nostro subjiciendum promittunt.