[23. Jänner 1708] I. congregatio 23. Januarii. Legebatur supplex libellus balneatorum civicorum facultati a consistorio pro informatione et consensu transmissus, in quo majestati supplicabant pro melioratione et confirmatione suorum privilegiorum petebantque varia absurda et primo loco magistri sive vulgo Zöchmayster desiderabant titulum principis seu vulgo Printzen oder Lehrherrn, loco suorum servorum vulgo Baadknecht petebant vulgo Gesellen et loco Baadjungen vulgo Mittler et loco Handtwerck praetendebant professionem, quae solet artem liberalem indigitare. Producebant simul attestatum a D. Plöckner, tunc temporis decano impetratum, vigore cujus majestati supplicabant, ut novis privilegiis inseretur, quod nobis in examine balneatorum assidere [fol. 194r] et simul nobiscum examinare possint ac debeant. At cum attestatum hoc non fuerit in plena congregatione neque ab omnibus approbatum, sic denique ab omnibus conclusum est, ut supplex hic libellus etiam pro informatione ad chirurgos tam civicos quam aulicos mitteretur. Sed chirurgi civici praeter morem dederunt suam informationem non ad facultatem sed ad consistorium, contra quem actum postea in congregatione publice protestatus, misi de novo decretum chirurgis aulicis cum comminatione, ut nobis tanquam primae instantiae intra triduum sub gravi poena iterum libellum supplicem unacum informatione extradant, quod et factum, licet multum obstaret syndicus universitatis et rector, qui aperte in consistorio dicebat, facultatem medicam nullam omnino jurisdictionem habere prouti nullam habet facultas juridica, quod tamen postea contra eos demonstravi, nempe chirurgos et balneatoros non consistorio sed facultati in quantum ad artem immediate subjectos. Haec actis inserere volui, ut successores sciant, quod consistorium et praecipue juristae privilegia nostra infrigere ac diminuere semper intendant.

Exinde informationem chirurgorum una cum nostra, ut confiramrentur antiqua privilegia consistorio tradidi.

Secundo, illud tractatum nempe cum jam plurium antecessorum acta desiderentur, hinc facultas firmiter et unanimiter constituit, ut imposterum nullus exdecanus juribus gaudeat neque admittatur ad officium aliquod, nisi prius acta sua extradat et deinde inscribat, cujus statuti executionem saepius quidem ursi sed nunquam effectum obtinui.

Tertio, fuit a lithotomis accusatus aliquis medicaster nomine Braun, quod ille solus varia remedia publice et per totum annum vendere praesumat. Fuit praelectus libellus uti etiam privilegium istius Braun, quod a facultate rejectum et conclusum, ut in futurum nec accusato nec accusantibus nec aliis quibuscunque tam in suburbiis, quam in civitate, solis nundinis exceptis liceret medicamenta sua etiam approbata vendere, quod conclusum illis per pedellum insinuavi ac memoratam venditionem sub gravi poena inhibui. Hoc decretum etiam tantum effecit, ut hoc anno nullus repertus sit, qui extra nundinas medicamenta sua vendidisset.

Quarto, Harpff med. stud. supplicabat, [fol. 194v] sibi assignari materiam pro disputatione baccalaureatus. Sed cum diu suam disputationem differret, Deus aliter disposuit et hic Harpff inter paucos morbi sui dies e vita discessit.

Quinto, a facultate mihi commissum est, ut cum nostra privilegia a moderno imperatore nondum confirmata essent, ut eorum confimiationem quantum possem, urgerem.

Sexto, supplicabat facultati Simon Deissenbofer, admitti ad examen. Sed cum protestarentur alii chirurgi aulici dicerentque, hoc esse contra nostra privilegia, illosque duos, qui praesentare voluerunt Deissenhofer, non esse legitime incorporatos. Sic fuit conclusum, cum adhuc sub judice lis esset, ut examen differretur ad finem litis.

Septimo, supplicarunt pro stipendio Emericano med. stud. Antonius Regula et Herbardus Josephus Petrogalli. Ad informationem. [fol. 195r]