In nomine domini Amen. Anno eiusdem Millesimo Trecentesimo Vndecimo In vigilia beatorum apostolorum Petri et Pauli. Nos Chunradus dei gracia Archiepiscopus Apostolice Sedis Legatus. Fridericus¹⁾ prepositus et Archidiaconus. Wichardus²⁾ Decanus Totumque Capitulum Sancte Salzburgensis Ecclesie. Statutum edidimus infrascriptum. Licet ecclesiarum infra nostram Prouinciam positarum curam gerere et sollicitudinem vigilanti studio debeamus, multomagis Ecclesie nostre Salzburgensis que aliarum prouincie nostre Ecclesiarum est domina et magistra sub cuius vmbra quiescimus et sedemus, que Nos eciam sepius consolacionis vberibus saciauit, tenemur periculis occurrere et necessitatibus subuenire, dum ea quod absit labente alie sibi subdite ecclesie collabantur. Cum igitur prefata nostra ecclesia Salzburgensis tum propter graues terrarum gwerras tum eciam propter multiplices expensas quas pro vtilitate nostre Ecclesie nos facere oportebat multis sit debitorum oneribus aggrauata et ipsius ecclesie prout cepta fuerit fabrica maneat incompleta Nos volentes eidem Ecclesie celeri et salubri prouidere remedio, nobis in Capitulo nostro conuenientibus, anno et die superius annotatis deliberatione prehabita diligenti, et tractatu premisso sollempni, communicato eciam consilio domini Heinrici³⁾ venerabilis Episcopi Gurtzensis Ecclesie, necnon aliorum sapientum, voto vnanimi et consensu duximus statuendum et presentibus statuimus ac eciam ordinamus, Reuerendum in Christo patrem et dominum, dominum Chvnradum. Archiepiscopum Ecclesie nostre, debere recipere et licite sibi per biennium retinere fructus siue prouentus beneficiorum ecclesiasticorum in sua dyocesi infra anni spacium inibi vacancium ob releuacionem oneris debitorum et ad opus fabrice melius reformandum. Ita tamen, quod Ecclesie taliter vacantes ex hoc Statuto debito in Spiritualibus et temporalibus obsequio non fraudentur. Vt autem Statutum predictum firmum et inuiolabile perseueret, presentes conscribi fecimus, et Sigillorum nostrorum munimine roborari.

Source Fulltext: DOPPLER