Ich Hainreich der Swab purgaer ze Chitzpüchel. vnd mein Hausfraw Katrei. vnd mein sün iohannes. vnd Bartholme. veriehen für vns vud für alle vnser erben offenleichen an disem brief. vnd tun chunt. allen den die in an sehent oder hörent lesen. Daz wir mit gutem willen. vnd mit verdachtem mut. vnser gut. niderhalben der gazzen ze prachouen.¹⁾ besucht. vnd vnbesuchtez mit allen nutzen. vnd mit allev dev. vnd dar zu gehört. daz wir gechauft haben. von Chunraden. von prachouen. vnd von Seinen erben. für ain ledigez vreiez aygen. geben haben. zu ainem rechten selgerait,²⁾ durch vnser selber sel willen. vnd durch aller vnserrn vodern sel willen. sant Andren vnd Seinem gotezhause gen Chitzpüchel. also mit sogtanem gedinge. daz man daz liecht. daz da hangt vor vnser vrawen schidunge. vnd ain wandlung cherczen. auf sant andres alter. ewichleichen. da von haben sol. vntze an den jungisten tage. vnd haben ez auch also gestift. daz der pharraer von sant johannes chirchen.³⁾ der hevt da ist, oder swer nach im chumt. mit der vorgnanten stift. noch mit dem vorgnanten gut. nicht ze schaffen sol haben. nevr der chirchprost. der hevt ist. oder swer nach im chirchprobst wirt. der sol stiften. mit dem vorgnanten gut. nach vier beschaiden manne rat. zwen auz dem marcht. vnd zwen auz dem Lande. vnd sol auch der vorgnant chirchprobst nicht mer nemene ze seinem nutze nevr sechez phenninge oder irn wert. ze vrchunde. in der stift. vnd sol auch man von dem vorgnanten gut. nicht mer alle jar geben. nevr Naevn schillinge Müncher phenninge. für Dienst. vnd für stewr. vnd für weisait. vnd für alle vodrunge. wir tun auch mer ze wizzen. daz wir daz vorgnant Liecht. für verdient haben. von sant Rutprechtez tage. der schierst chumt. vber ain jar. auf dev beschaidenhait. den dienst. der von dem gut gehört. daz der beraiter sol da ligen. jairleichen. an vnser vrawen tach. als si geboren wart. daz man öle dar vmb chauffen sol. auf daz jar. daz dar nach chünstiche wirt. wir wellen auch mer. daz der vorgnant pharraer. der hevt ist. oder der nach im chümt. sich dez gutez vnderwinden wolt. mit rede. oder mit der stift. oder mit swelchen sachen daz waer. So ist das vorgnant gut dem vorgnanten gotezhauß enphallen. vnd ist vnser. vnd vnserr erben. vreiez aygen. als an dem tage do wir ez da hin geben haben. vnd dar ober ze ainem vrchunde daz ez dem vorgnanten gotezhauß staet vnd vnzebrochen beleiwe. an allez gevaer. gib ich der vorgnant Hainreich der Swab im disen brief. versigelten mit meinem hangentem Insigel. dez sint zevg. her vasolt der Alpeche. richter ze Chitzpüchel. Hainreich sein pruder. chunrat von prachouen. Ott. vnd Nicla. die Münichawer. chunrat der Graeiswein. Fridreich der Seraevtaer. vnd ander erbaer laevt genüge. Der prief ist geben ze chitzpüchel. do man zalt von vnsers herren geburtt. drevzehen hundert jar. vnd dar nach in dem ainem vnd dreizzigistem jar. an vnser vrawen tage. in der vasten.

Source Fulltext: DOPPLER