Ich Ott Rudlant vnd mein Havsfrawe Dyemut veriehen für vns vnd für all vnser Erben offenleich an disem Brief vnd tun chund allen den di in ansehent. oder horent lezen. daz wir mit gutem willen vnd mit verdachtem mut ze Choffen haben geben Symon dem Rutzenlachkner und Dyemuten der Rutzenlachknerin vnd ir Payder Erben mein gut datz Prunn¹⁾. ain Vyertail auz gantzem gut mein tail besucht vnd vnbesucht mit allen den nützen vnd Rechten vnd zu dem Vyertail gehort. vmb fyerdhalbs vnd zwaintzichk phfunt Saltzpurger Pfenning der Si mich verricht vnd gewert habent gar vnd gantzleich. wir schüllen auch in daz gut aufgeben. Hintz dem Hern da iz lehen von ist wir schullen auch dez selben gutz wir vnd vnser Erben ir vnd ir Erben gewer Sein alz iz in verlihen wirt Iar vnd tag alz dez lantz vnd rechtes lehens recht ist. tat ich dez nicht weranen Schaden Si dez naemen den schüll wir in ab tun gar vnd gantzleich. vnd schüllen Si den haben auf aller meiner hab. daz in daz staet beleib an gever geb wir in disen offen brief versigelt mit Hainrich dez Oechsenpergers²⁾ anhangenden Insigel. im an schaden. da verpint ich mich Ott Rudlant vnder vnd mein Havsfrawe Diemut mit vnsern trevn wan wir an gewer aigner Insigel nicht enhaben. der tayding sint züg Her Vasolt der altpechk Rulant Panholtz Hainrich Frut Hainrich Lüntz Orrel ab dem Hegel vnd ander Erber Levt. der brief ist geben ze Chitzpühel do man zalt von Kristes gepurt Drevtzehen Hundert Iar vnd da nach in dem Ain vnd Fyertzigisten Iar dez Erhtags vor Ostern.

Source Fulltext: DOPPLER