Ich Chunrat der Ochsenperger von Gunthalming¹⁾, vnd mein Hausfraw Penditl²⁾, vnd vnser Sün, Nicla, Chunrat, vnd Hainrich, vnd vnser töchter, Margret, Diemut, Elispet. vnd Gerdraut, wir veriehen für vns, vnd für all vnser erben. Sün und töchter, Offenleich an disem brief vnd tun Chunt allen den die in an sehent oder horent lesen, daz wir mit gutem willen vnd mit verdachtem mut, ze Chauffen haben geben, dem gotzhaus ze Chitzbühel Sand Andreen, vnd Andern Heiligen, die in demselben gotzhaus Rastent sint, vnsern tail ainen Sechsten tail aus dem gut ze Ober Aygen³⁾, besucht vnd vnbesucht mit allen nutzen vnd rechten vnd dar zu gehörent, für ein ledigs vnd rectz aygen, vmb Sechtzehen phunt Müncher phenning, der wir gar vnd gaentzleich verricht vnd gewert sein. Ez schullen auch wir vnd vnser erben dez vorgenanten gutz, gewern sein, dez obgenanten gotshaus, als dez lantz vnd rechtz aigens recht ist. taet wir dez nicht, welichen schaden daz Egenant gotshaus dez naem den schullen wir im ab tun, vnd schol iz den haben auf unserm tail auf ainem Sechsten tail aus dem gut ze Oechsenperge⁴⁾ daz wir im dar vmb ze rechtem fürphant gesetz haben, Daz die taidinge also staet beleiben, dar vber ze vrchunt der warhait gib ich vorgenanter Chunrat dem Egenanten gotzhaus disen brief versigelt vnder meins vettern Hainrich dez Oechsenpergers Hangenden Insigel, do ich mich vnder verpint mit meinen trewn wan ich angevaer nicht aigens Insigels haben. Der taiding sint zeug, Her Chunrat der Reuthaimer ein priester. Chunrat der Oechsenperger, Hainrich der Chappentzagel. Ulrich der Heglaer. Chunrat de Schaflützel. vnd ander erberg laeut genug. Datum anno domini Millesimo ccc^mo xlj. In die sancti Andree Apostoli.

Source Fulltext: DOPPLER