Ich Peters dev Swerstaininn, Engelprechtz des Smitz Tochter enhalb Ach, vergich offenbar mit disem prief vnd tun chunt allen den die in ansehent oder horent lesen, Daz ich mit gutem rat, vnd mit wolverdachtem mut do ich es wol tun macht Ditz geschaft das hernach verschriben staet, geschaft han auf meinem Haus¹⁾, daz gelegen ist vnder den Smiden enhalb Ach, Daz mir mein Vater Engelprecht, vnd mein muter Elspet lazzen habent, Den Got gnad, mit sotaner beschaidenhait, Ob ich es ersparn mag ober mein not turft vntz an mein end, Nach meinem tod geschaft han, Des ersten hintz sand Peter, ein Halbphunt phenning alle Iar von dem selben Haus dem Conuent, daz si begen schullen alle Iar, Iartag meines Vaters, vnd meiner muter. vnd meines Pruders hern Engelprechtz die vor genant sind, vnd auch mein mit den andern mit Vigili gesprochen vnd mit Messe gesungen, Hintz der Pharr fünf Schilling²⁾, der gehorent vnser frawen an zu dem Liecht Dreisich phenning di eemolen auf dem haus sind gelegen, Vnd dem Pharrer Sechtzig phenning, vnd den Drin gesellen die der Pharre dient Sechtzig phenning, darumb man auch begen schol vnsern Iartag als vor verschriben staet. Hintz Nunnburch Drei schilling phenning, dem Conuent Sechtzig phenning, vnd den Drin Priestern Dreisich phenning die daz Munster besingent, daz sev vnsern Iartag begen alle Iar Iaerchleich mit Vigil gesprochen vnd mit Messe gesungen ewichleich, In der Puriger Spital ein Halbphunt phenning den Siechen, Vnd schullen auch die Puriger die des Spitals phleger sind, daz vorgenant Haus inne haben, vnd verrichten, vnd stiften als des, als vor verschriben ist, vnd auch des priefes behalter sein. Vnd was vbriges Zinzz von dem haus chomme mocht vber die zwai phunt phenning Seltz als verschriben ist, die schol man zepesserung legen auf daz eegenant haus, zu swev sein not ist. Daz, daz als stet vnd vntzeprochen beleib, Dar vber gib ich vorgenantev Peters dev Swaerstaininne disen prief versigelten mit des Erbern herren hern Ludweiges pharrer vnd Chorherren ze Salzburg anhangunten Insigel versigelten, Der daz an disen prief gelegt hat, durch mein pette willen, wand ich vorgenantev Peters Insigels nicht enhet, zu einem vrchund der warhait. Der prief ist geben, do von Christes gepurd ergangen warn Drevtzehen Hundert Iar, Darnach in dem Fümf vnd Viertzgisten Iar, an sand Görigen Tag.

Source Fulltext: DOPPLER