Ich Fridrich Honawer Techant und Pfarrer ze Chirchpüchel. vergich vnd tun chunt allen den, di den prief ansehent oder hörent lesen. Daz der erberg man Vlrich der Synssaer ¹⁾ zue einem Selgeraet ledichleich vnd vreileich geben hat mir vnd meinen nachchomen vnd dem Gotzhaus ze Chirchpühel. seinen garten der gelegen ist pey dem vreithof vnd gehaissen daz Vreingaertel vnd der geaygent worden. zue der Chirchen von Chaiser Ludwig, also in der mainung, daz ich, vnd all mein nachchomen im dar vmb vnd seinen vodern alle iar einen iartag mit drein Priestern schol begen, vmb Sand Gallen tag in acht tagen vor oder nach an allen abganch, vnd swelhs Iars ich oder mein nachchomen den selben Iartag nicht begiengen, so schol ich oder mein nachchomen als oft drew phunt perner geben an daz erwerg Goczhaus ze Chiemsee zu dem liecht, Daz im daz von mir vnd von meinn nachchomen also staet vnd vnzerbrochen beleib, dar vber zue einem vrchund gib ich im den prief versigelt mit dez wirdigen vnd erwergen herren. her. Heinrich Propsts vnd Erzpriesters ze Chiemse ²⁾ Insigel, der daz durch meiner pet willen dar an gelegt hat im vnd seinem Goczhaus an schaden, vnd auch mit meinem Insigel, Daz ist geschehen nach Christes gepurt Dreuzehen hundert Iar, vnd in dem niun vnd Vierczisten Iar dez nachsten tag nach Sand Gallen tag.

Source Fulltext: DOPPLER