Ortolfus Dei gracia Salzburgensis Ecclesie Archiepiscopus. Apostolice Sedis Legatus. Dilecto in Christo Alberto de Paulsdorf, dicte nostre Ecclesie Canonico et Custodi salutem in domino. Et si omnium ecclesiarum nostro regimini commissarum profectibus ex debito pastoralis officii intendere teneamur, decorem tamen domus dei videlicet dicte Salzburgensis Ecclesie Sponse nostre cui defingendo manum apud deum fide media copulamur tanto ardenciori zelo nos conuenit ordinare, quanto excellencius super omnes alias nostre prouincie ecclesias velut Magistra primatum obtinet et ipsius honoris magnificencia filiarum gloria reputatur. Sane dudum prehabito diligenti tractatu cum dilectis in Christo Hertnydo Preposito, Pilgrimo tunc Decano et Capitulo nostro de ipsorum consilio et consensu dimidiam partem fructuum primi anni omnium Ecclesiarum Parrochialium nostre diocesis. ad nostram collacionem spectancium, aliter quam ex causa permutacionis vacancium ad fabricam eiusdem nostre Metropolitane ecclesie duximus conseruandam. Quia tamen non nulli quibus vacantes nobis parrochiales ecclesias contulimus, apud dictam nostram Metropolitanam ecclesiam. a qua promocionum suarum stillicidia emanarunt se reddentes ingratos dictam porcionem uel eius partem vsque modo soluere neglexerunt. Deuocioni tue committimus et mandamus, quatenus eosdem et alios qui se deinceps negligentes et rebelles exhibuerint inpremissis. ad dicte porcionis solucionem dicte fabrice integraliter faciendam per censuram ecclesiasticam auctoritate nostra arceas et compellas. Nos quoque sentencias per te in rebelles huiusmodi canonice et racionabiliter promulgatas, ratas. et gratas habebimus facientes eas auctore domino inuiolabiliter obseruari. Datum Frisaci in crastino apostolorum Symonis et Jude Anno domini Millesimo. ccc^o. xlviiii^o.

Source Fulltext: DOPPLER