Ich Elspet Chuenrats dez Stubechen Witib. vnd ich Moyses vnd Lucas ir Sün. vnd ich Vrsel vnd Agnes ir Töchter. Wir vergehen offenbar an disem brief für vns, vnd für all vnser erben vnd chinder, daz wir mit besunderm rat vnd gunst Iacobs des Schützen, seiner hausfrawn vnd Erben vnd anderr vnserr vreunt, durich vnserr rechten vnd grozzen notdurift willen, recht vnd redleich haben verchauft, Herrn Chunrat Pfarrer ze Stuluelden vnd seinem Gotzhaus da selben. vnser Aygen ze Niderrevt in der Stubach ¹⁾, vmb Siben pfunt pfenning, der wir gar vnd gantz gewert sein. vnd der wir vierdhalb pfunt enphangen haben, vnd der egenant Iacob der Schütz vierdhalbs, von des satzes wegen auf dem selben Aygen, daz wir iem vnd seinem vater heten versetzet. Wir haben auch dem egnanten pfarrer daz vorgnant Aygen gewen fur ein freys vnd lediges guet, mit allen den rechten, nützen, vnd eren, di da zve gehörent, ze Veld vnd ze Dorf, besuecht vnd vnbesuecht wie di gnant sind. Vnd haben auch iem mit veraintem muet vnd willen, vmb daz selb aygen ze Niderrevt gesetzet ze einem rechten vnd endhaften fürpfand vnser Aygen ze Stubach ²⁾, da Rudel weilent auf sas, mit allen den rechten, nutzen vnd eren di da zve gehörent wie di gnant sind, in aller der mazz, als aygens vnd dez Landes recht ist. Vnd schullen auch dez oftgnanten guetes ze Nidernrevt, dez egnanten pfarrer vnd seins Gotzhaus gewer, versprecher, vnd austrager sein, für all chrieg vnd ansprach, an seinen schaden, wo iem dez not geschicht. Vnd schol er daz haben auf vnserm vorgnanten guet ze Stubach, vnd da zve auf vnsern trewen, vnd auf aller vnserr hab, vor allen geltern. Dar vber ze einem vrchund der warheit gewen wir iem disen offen brief, vnder vnsers lieben Herren Hern Heinrich von Velben anhangendem Insidel, der daz durich vnserr pet willen daran vnd an schaden hat gehangen, wan wir aigner Insidel, ze einer zeuchnüzz seins willen, den er zve den voruerschriben sachen hat gewen. Vnd verpinden auch vns mit vnsern trewen, allez daz staet ze haben, daz an disem brief verschriben stet. Der ist gewen do von Christes purt warn ergangen dreutzehen hundert Iar, dar nach in dem ain vnd fümftzgisten Iar an dez heiligen Chreutzes tag, als ez funden wart.

Source Fulltext: DOPPLER