Ich Chuonrat Waech vnd mein hausfrawe wier veriehen für vns vnd für all vnser erben offenleich an disem brief allen den die in sehent hörent oder lesent, Vmb den Jartag den meins vorgenanten Chuonrat Vater saeliger Chuonrat der waech geschaft hat ¹⁾ auf Prachouen vnd auf Lachen zehen schilling phenning Iaerleichs geltz, als der brief sagt den er dar vmb geben hat, daz wir den selben gelt zehen schilling Iaerleichs geltz zuo demselben Iartag nach dez Richter vnd der Purger Rat ze Chitzpühel zaigt vnd bestaett haben, auf vnserm tail ze Prachouen vnd was zuo vnserm tail gehört besuocht vnd vnbesuocht, vnd auf dreyn Aekchern, der zwen ligent in dem naechsten Marchtueld ob Fricz Ruodlantz vnd hat der Serraeutter ainen akcher zwischen der zwaier ligent. vnd der ain leit in dem Enern Marchtueld vnter dem Hegelrain an dem naechsten pei dem Graesweg, auch besuocht vnd vnbesuocht mit allen nützen vnd rechten vnd dar zuo gehört In der beschaiden, daz der vorgenant Iartag Iaerchleich do von begangen schol werden nach dez briefs sag, den mein Vater saeliger dar vmb geben hat. Wir schüllen auch die vorgenanten Aekcher vnd den tail auf dem guot ze Prachouen nindert verchumern verchauffen noch versetzen vmb dhainerlay vnser notdurft niur daz der vorgenant Iartag do von Iaerchleich begangen schol werden als vorgeschriben ist. Swer auch die vorgenanten Aekcher inn hat, der schol die voderung Iaerchleich gen der Herrschaft ausrichten do von vnd den zaun nach der nachtpauren rat. Dez ze vrchund geben wier disen brief versigelt vnter der Purger Insigel ze Chitzpühel, den Purgern vnd dem Marcht an schaden, do wier vns vnder verpunden haben mit vnsern trewn, wan wier selber nicht Insigel hieten. Dez sind zeug Hainrich Maeusel ze den zeiten Richter ze Chitzpühel. Paertel Swab. Perchtolt von Durrenperch vnd ander erberger laeut genuog. Datum Anno Domini M ^o ccc ^mo lxij ^o In die sancti Erasmi.

Source Fulltext: DOPPLER