Ich Andre der Sulczperiger vnd mein Havsfraw vnd all vnser erben ez sein Sün oder Tochtter vnd aller meins Prueder vnd Swester chind Ez sein auch Sün oder tochtter swie so di benant sind veriehen vnd tuon chund offenbar mit dem brief allen den di in ansechent oder horent lesen. Daz wir vnuerschaidenleichen mit einander recht vnd redleich ze chavffen haben geben fur ein freys aygen. dev wisen dev gelegen ist in der aych wys ¹⁾ mit allen nuczen eren rechten vnd gesuechen di zu der selben wysen von alter gehorent swie di benant sind an geuär Dem erbern Hainrich dem Huebär von nydern Eching seiner havsfrawn vnd allen iren erben. ez sein Sün oder Töchter vmb Drevczechen pfunt Rengspurger pfenning vnd der wir gancz gewert sein an schaden. vnd sullen wir der egenanten wisen ir gewer sein alz dez Landez recht ist für all chrieg vnd ansprach Daz in daz von vns allen also gancz staet vnd vnzebrochen beleib Dar vber ze einem vrchunde der worhait geben wir in den brief versigelten mit meinem egenanten Andres dez Sulczperger aigen anhangundem Insigel, dar vnder sich meins pruder chind meiner Swester chind all mein erben vnd nachchomen mit sampt mir ze einer pezzern sicherait vnd verzeichnüzz verpintent an geuär Der brief ist geben do man zalt von Christes gepuert Drevczechenhundert Iar dar nach in dem Drev vnd Sechczigistem Iar dez Mitichens vor sand Vincenten tag.

Source Fulltext: DOPPLER