Ich Thoman der Schütz von Toberspach ¹⁾ vergich für mich vnd für all mein Erben offenbar mit dem brief, vnd tuen chunt allen den di in sehent, lesent oder hörent lesen. Daz ich mit guetem willen, vnd mit meiner freunt rat, chaufleich vnd redleich ze chouffen han geben, Herrn Chunrat Pfarrer ze Stueluelden vnd vnser frawen da selben, mein guet ze Stueluelden daz genant ist Awen ²⁾ für vreys vnd ledigs aygen, mit allen den rechten, nützen vnd eren di da zue gehörent besuecht vnd vnbesuecht ze dorf, ze veld, in wismat, in awen, oder ze holtz wie di genant sint, vmb Neuntzehen pfunt wienner pfenning der ich gar vnd gantz gericht vnd gewert pin, vnd di ich nach meiner freunt rat mir vnd meinen Erben nutzleich vnd ze pezzerung han angelegt. Auch vergich ich daz ich dez vorgnanten guets ze Awen, dez egnanten Herrn Chunrat vnd aller seiner nachchomen rechter gewer, fürstant vnd vertreter sol sein an rechtes Aygens stat für all ansprach vnd chrieg wo, oder wenn im dez not geschicht, mit recht oder an recht als dez landez recht ist. Vnd sol auch vnd mein Erben da wider nichtes reden noch tuen mit wortten oder mit werchen, weder mit recht noch an recht. Naem auer er dar vber von dez vorgnanten choufes wegen dheinerlay schaden, den sol ich im mit sampt dem houptguet ablegen gar vnd gantz, vnd sol daz haben auf meinen trewen vnd auf aller meiner hab wie di gnant ist, ligend oder varent, vor allen andern levten vnd geltern. Dez chaufes vnd tayding sint zeug. Haug von Spilpühel. Heinrich der Reüzzel purger ze Mittersil. Andre von Toberspach. Chunrat der Vöchler. Fr. der Lehner. Nykla Fridrichs Prueder von Awen. vnd ander erber levt genueg. Dar vber ze einem besundern vrchund der warhait gib ich im den offen brief, mit dez erbern herren hern Heinrich von Velben ze den zeiten pfleger ze Mittersil, vnd dez erbern Ritter hern Niclas dez Holerspechen anhangendten Insigeln, di si durich meiner vleizzigen pet willen, in an allen schaden dar an haben gelegt. Vnd han auch mich dar vnder mit meinen trewen, vnd all mein erben verpunden, alles daz ze volfüren vnd stat ze haben, daz an dem brief geschriben stet wan ich aygens Insigels nicht han. Der brief ist gewen do man zalt von Christes purt dreutzehen hundert Iar, dar nach in dem drei vnd Sechtzigisten Iar an sand Vrbans tag.

Source Fulltext: DOPPLER