Ich Agnes Chunrat dez Rueczenlakchner Tochter dem Got genad vergich mit disem prief für mich vnd für all mein Erben. allen den die in sehent oder horent lesen. Daz ich mit gütem willen vnd nach Rat meiner freunt vnd ander Erber laeut verricht vnd vertaidingt pin mit meinem Vettern Lienharten dem Altpegkchen ¹⁾ mit seiner Hausfraun vnd mit allen iren Erben vmb all ansprach vnd voderung die ich gehabt han ron meinez vaeterleichen vnd müterleichen Erbentails wegen auf daz Güt ze Prunn. ²⁾ daz leit an dem Pflügsperig ³⁾ vnd waz dar zü gehört. Daz ist also gesprochen getaidingt. Daz ich noch mein Erben chain ansprach noch vöderung auf daz egenant Güt nimer haben noch gewinnen schol. mit Recht noch an Recht noch mit chainen sachen. Dez ze Vrchund gib ich in disen prief versigelt mit Hansen des Swabs anhangendem insigel im an schaden da ich mich vnder verpind mit meinen treuen staet zu haben was vor geschriben stet wan ich an geuer nicht aigens insigels het Dez sind Taidinger gewesen vnd sind zeug Ortolf Greswein, Chunrad Öchsenperger, Nicla Munichawer, Paertel der Swab, Iorig sein Aidem, Fridreich der Praemel, Perichtold von Durenperch vnd ander Erberg laeut genüg Datum Anno Domini Millesimo ccc. lxiij ^o proxima Dominica ante festum beati Galli confessoris.

Source Fulltext: DOPPLER