Ich Peter der Alt Chäwtzel Burger ze Saltzburch, mein Hausfrawe vnd all vnser Erben veriehen vnd tuon chuont offenbar mit dem prief allen den di in ansehent oder hörent lesen, Daz wir mit wolbedachtem muot vnd mit guotem willen recht vnd redleich ze chawffen haben geben dem erbern Mann Heinrich dem Grafen ¹⁾ ze den zeiten Probst ²⁾ ze Werifen. seiner Hausfrawn vnd allen iren eriben. die Äkcher die gelegen sint ze Werfen vnter dem Selperg die emaln der Pfleger Burger ze Werifen von vns inn hat gehabt, mit allen den nützen vnd eren vnd gesuochen die dar zuo gehörent, alz wir si gechauft haben von vnsrer Muomen der Gräwlinn vnd habent vns die egenanten Äkcher gar vnd gantz vergolten nach allem vnserm willen. vnd süllen auch wir der vorgenanten Äkcher ir gewer sein wo in sein not geschiht, mit dem rechten. alz Puorchrechtz vnd landes recht ist. Daz in daz alles staet vnd vntzerbrochen beleib Zeugnuozz der warheit geben wir in disen offen prief versigelten vnder meines egenanten Peter Chäwtzleins anhangundem Insigel. Der prief ist geben Nach kristes gepurt dreutzehen hundert Iar dar nach in dem vier vnd Sechtzigistem Iare. an vnsrer Frawen tag. alz si geporn wart.

Source Fulltext: DOPPLER