Ich Hainreich Maeusel, Ich Diemuot sein Hausfrawe, wier veriehen für vns, vnd für all vnsere erben, Offenleich an disem brief allen den die in sehent hörent oder lesent. daz wier mit guotem willen vnd mit verdachtem muot, nach vnsrer freunt vnd andrer erberger laeut Rat. geben. bestaett. vnd geschaft haben, vnser guot daz haist Chelichmosen ¹⁾ vnd leit in der Chochawe in chitzpüchler gericht. daz vnser rechtz aygen gewesen ist. besuocht vnd vnbesuocht mit allen nützen vnd rechten die dar zuo gehörent, an sechtzikch phenning. die do von gent ze dienst vber den Hofzaun Iaerchleich andern laeuten. durch vnsern vnd aller vnserer vodern Sel willen in der mazz ob wier ez ersparen vnd ervbrigen mügen, vnd auch in der beschaidenhait, daz wir Iaerchleich von demselben guot. vnsrer Frawen gen sand Iohans chirchen ain phunt wachs. vnd sand Andren gen Chitzpühel ain phunt wachs vnd gen Aurawe ²⁾ ain halb phunt wachs. vnd in daz Raeutt ³⁾ ain halbs phunt wachs. in daz liecht ze nutz vnd ze gwer geben schullen, die weil wier leben. vnd nach vnsrer paider tod. swann wier nimer sein. swer denn dez gotzhauss phleger vnd chirchprobst ist ze Chitzpühel. der schol sich des vorgenanten guots vnderwinden, vnd schol daz dann Iaerchleich bestiften vnd besetzen nach zwaier erberger purger Rat ze Chitzpühel. vnd schol dann daz vorgenant wachs Iaerchleich auf die vorgenanten gotzhaeuser von dem obgenanten guot geben ie auf sand Michels tag. vnd swas dann daz vorgenant guot. vber daz egenant wachs Iaerchleich gilt vnd dient, da schol der vorgenant chirchprobst Iaerchleich ainen Iartvg von begen, datz sand Andres gotzhauss ze Chitzpühel, durch vnsrer vnd vnsern vodern Sel willen, nach aller heiligen tag in der wochen mit dreyn priestern. mit dem pharrer ze sand Iohans chirchen. mit seinem gesellen. vnd mit dem gesellen ze Chitzpühel. man schol auch dem pharrer, swan er zuo dem Iartag chümt geben sechs vnd dreissikch phenning als si ie gib vnd gaeb sind. für mal vnd für all sache, seinem gesellen achtzehen phenning. vnd dem gesellen ze Chitzpühel vier vnd zwaintzikch phenning, vnd ob ain priester an gevaer zuo dem Iartag chöm, dem schol man geben achtzehen phenning. dem Chirchprobst zwelif phennning. vnd dem Mesner Sechs phenning, vnd swas dann dez vberigen ist, daz schol man geben arm laeuten, durch got, durch vnsrer vnd aller vnsrer vodern sel willen. Waer auer ob der Chirchprobst an dem vorgenanten geschaeft indert saumikch waer. swer dann die gesworn vnd dez Ratz ze den zeiten ze Chitzpühel sind, die habent vollen gwalt sich dez oftgenanten guotz ze vnderwinden. vnd daz vorgenant geschaeft do von ze volfüren vnd ze volenden von iren trewn. durch got vnd durch der rechtichait willen, vnd schol auch dhain vnserr erb wider daz vorgenant geschaeft dhain widerred haben. Es schol auch daz vorgenant guot nicht höher bestift werden dann vmb den alten dienst. vmb zehen schilling phenning minner zwelif phenning. für all voderung, vmb daz gelt als dann gib vnd gaeb in dem land ist, an die sechtzikch phenning die vor geschriben stent. Dez ze vrchund haben wier vns verpunden vnder dez Marchtz Insygel ze Chitzpühel. vnd vnder Hainreichs des öchsenperger Insygel. in an schaden. wan wir selber nicht Insygel haben. Dez sind zeug Bartholomeus Swab. Iohannes sein pruoder. Dietreich vnd Vlreich die Schaflützel, Fridreich der Praemel vnd ander erberig laeut genuog. Datum Anno Domini Millesimo ccc ^mo lv ^o In die sancte Lucie virginis.

Source Fulltext: DOPPLER