Ich Hainreich der Graf ze den zeiten Brobst ze Werifen mein Hausfraw Vnd alle vnser Eriben Veriehen offenwar mit dem prief vnd tün chund alle den die in ansehent oder hörent lesen Daz wier recht vnd redleich ze chauffen haben geben dem Erbern Herrn herrn Vlreich dem Perkchofär ¹⁾ vnser purkchrecht ist gehaizzen Santzchendel vnd ist gelegen ze Werifen pei dem Lantzenweg oberthalben dez wegz mit allen den eren Rechten nützen vnd gesüchen die dar zü gehörent vnd alz wierz her pracht haben an geuär also daz er in daz Chelerhaws ze Werifen noch niemant nichtz da von dienn sol Vnd daz er vnz gar vnd gantz vergolten hat mit beraitem pfenning nach allem vnsern willen vnd an allen vnsern schaden Wier haben im auch daz voruerschriben Purkchrecht ingeantwurt awz vnser nutz vnd gewer in sein nutz vnd in sein gewer Also mit dem glüben daz wier noch chain vnser eriben fürbaz auf daz voruerschriben purkchrecht nichtz ze sprechen schüllen haben weder mit gaistleichem noch mit weltleichem recht an geuär Waer auch ob in dehayn chrieg oder ansprach icht angieng von dez vorgenanten purkchrechtz wegen da schüllen wir in vmb vertreten vnd richtig machen alz daz Lantz vnd Purkrechtz recht ist an geuär. Mit Vrchund dez priefs den wier im dar vber geben versigelt mit meim egenanten Hainreich dez Grauen anhangunden Insigel Dar vnder sich mein Hausfraw vnd all vnser Eriben verpintent mit iren trewn alz daz staet ze halten vnd ze volfüren daz vor an dem prief verschriben stet Der geben ist an Midichen vor dem Antloz tag Do man zalt von Christes gepurt Drewtzehen Hundert Iar vnd dar nach in dem Acht vnd Sechtzigistem Iar.

Source Fulltext: DOPPLER