Ich Nycla der zimmerauwer ich Hainrich sein pruoder. wier veriehen für vns, vnd für alle vnser erben, Offenleich an disem brief vnd tuon chunt allen den die in an sehent oder hörent lesen, daz wier mit guotem willen vnd mit verdachtem muot, vnd ze der zeit do wier iz wol getuon mochten, gemacht vnd geben haben, dem gotzhaus ze Chitzpühel Sand Andren vnd andern heyligen. die in dem selben gotzhaus Rastent sind, fünf schilling phenning minner Sechs phenning. ie ainen chraeutzer für drey phenning, Iaerleichs geltz, auf den Hofsteten vnd garten, die pey dem vorgenanten gotzhaus ligent, auf der hofstat vnd auf dem garten, do der Mausser vnd sein sun auf Sitzet. Sechtzikch phenning Iaerleichs geltz. vnd da haintz der champer auf sitz. dreißich phenning. vnd do leupolt der Ramler auf sitzet. Sechs vnd zwaintzich phenning. vnd auf chuenn der goglin haus auch Sechs vnd zwaintzich phenning. In der weschaydenhait, swer des vorgenanten gotzhaus phleger vnd chirchprobst ist, daz der den Egenannten gelt Iaerchleich in nemen schol. ab den obgenanten haeusern vnd garten zuo dem vorgenanten gotzhaus in daz liecht, vnd schol auch jaerchleich von dem Egenanten gelt geben vier vnd zwaintzich phenning. Swer gesell vnd Singer ze chitzpühel ist, vnd waer auer, ob dem vorgenanten gotzhaus an dem obgenanten gelt icht abgyeng, daz schol auch ab gen dem hern, swer gesell ze chitzpühel ist. So veriehen auch wier des vorgenanten Hainrich dez zimmerawers sün, hainrich vnd chuonrat, daz wir daz vorgenant geschaeft staet haben, daz vnser Vater getan hat, vnd daz die vorgenanten tayding vnd geschaeft also staet beleiben, dar vber ze vrchund der warhait geben wier dem vorgenanten gotzhaus dysen brief versygelt vnder Eberhartz dez Halaprugkers hangenden Insygel. im an schaden. vnd do wier vns vnder verpinden. mit vnsern treun vnd auch wier vorgenant, hainrich vnd chunrat, hainrich des zimmerawers sün wan wier nicht selber Insygel haben. als daz staet ze haben daz vor gescriben ist. Der tayding sind zeug, Fridrich der öchsenperger, dietrich schafluczel. dietel der öder vnd ander erberg laeut genuog. Datum anno domini Millesimo CCC ^mo. xlviiij^o. proxima quarta feria ante festum sancti Egydii Episcopi. (sic)

Source Fulltext: DOPPLER