Ich Chunrat Rüdlant purger ze Chiczpühel vnd mein Hausfraw vnd all vnser Erben Sün vnd Töchter wir vergehen Offenbar an disem prief für vns vnd für all vnser Erben vnd tun chunt allen den die disen prief ansehent oder hörent lesen Daz wir mit gutem willen vnd mit verdachtem mut, daz wir verschaft vnd geaygent haben durich vnser Sel vnd durich vnser vödern sel willen zwai phunt phenning Gelcz auf vnserm Güt dacz Täurn daz vnser Rechcz Aygen ist zu einem Ewigen Iartag den man vns da von iarchleich haben vnd begen schol. vnd ob daz war daz an den vörgenanten zwain phunten dacz Taurn icht ab gieng daz schol man nemen vnd haben auf vnserm gut dacz Egk daz auch vnsern Recht Aygen ist vnd wer den Iartag beget der schol drein herren geben ie dem herren fumfczehen phenning ze Oppfer phenning wer nicht ze Oppfern hab. Vnd schol auch geben zu den vier Töten cherczen iärichleich Sechczich phenning vnd wer hie gesell ist ze Chiczpühel. dem schol man geben voraus zwelif phening daz er vnser vnd vnser vödern gedench vnd dem Mesner drei phening vnd schol auch den iartag niemant begen neur vnser Erben oder vnser frunt. wolten die daran säumich sein so schol in haben wer Chirichpröst dann ist oder dar nach wirt So wirt vber die zwen vnd fümf schilling die vor geschriben sind noch Aynlef schilling da schol man von chauffen vmb drei schilling Chas vnd vmb ein phunt prot da man von hab ein Offen spent Vnd dar vber ze einem Ewigen vrchund gib ich disen prief vnd all mein Erben daz daz nimmer zebrochen werd vnd Ewichleich stät beleib mit Dyetreichs des Schaflüczel anhangenden Insigel im an schaden der daz durich pet willen daran gehengt hat. Des sind Zeug Pärtel der Swap Hainrich Rüdlant Dietreich der Sneider vnd ander Erberg läut genug. Datum Anno domini M^o. ccc^o. xlviiii^o feria Quarta ante Partholomei Apostoli.

Source Fulltext: DOPPLER