Ich Fridrich phaffenperger Ich Offmey sein Hausfrawe. Ich Andre taurer Ich Alhait sein Hausfrawe Wier veriehen offenbar mit disem brief allen den die in sehent hörent oder lesent. daz wier mit guetem willen vnd mit verdachtem muet durch vnserr vnd aller vnserr vodern sel willen geben vnd geschaft haben Sand andres gotzhaus ze Chitzpühel. vnser haus hofstat vnd garten daz wier Chauft haben von dem Chögellein vnd als wiers inn haben besuechtz vnd vnbesuecht mit allen nützen vnd rechten vnd dar zuegehört das rechtz freys aygen ist, In der beschaiden daz wier ez inn schullen haben vnd niezzen, die weil wier leben vnd schüllen doch Iaerchleich ie ze sand Michelstag ein phunt wachs dovon geben dem egenanten gotzhaus ze nutz vnd ze gwer, vnd swan wier dann nimer sein, so ist ez desselben gotzhaus ledigs vnd freys aygen, vnd swer dann sein phleger ist der schol vnd mag ez hinlazzen vnd besetzen als er pest mag von seinen trewn, also daz er dieselb vodrung di do von gevelt Iaerchleich in nemen schol in daz liecht zu dem obgenanten gotzhaus. Wir haben auch daz geschaeft getan in der weis swelichs vnder vns vorgenanten viern lebt, daz daz alliu die recht auf dem haus hofstat vnd garten haben schol, als ob wir alliu vierev lebten. Ez schol auch dhain vnserr erben dhainerlay ansprach noch vodrung auf daz selb haus hofstat vnd garten haben noch gewinnen weder mit recht noch an recht, die weil wier leben noch nach vnserm tod. Dez ze vrchünd haben wir vns verpunden vnder der purger Insigel ze Chitzpühel, den purgern vnd dem Marcht an schaden. Dez sind zeug, Hainrich der Püchler, Chuentz der zürn, dietrich der taschner vnd ander erberger laeut genueg. Datum Anno domini M ^o CCC ^mo lxij In die sancti Mathye Apostoli.

Source Fulltext: DOPPLER