Ich Elspet Fridrich dez öchsenperger wittib dem got Gnad, Ich Iohans ir Sun vnd mein Hausfrawe wier veriehen für vns vnd für all vnser erben an disem brief, allen den die in sehent hörent oder lesent, daz wier mit guotem willen vnd mit verdachtem muot nach vnsrer freunt vnd andrer erberger laeut Rat. Redleich vnd Chaufleich ze Chauffen geben haben dem Gotzhaus ze Chitzpühel Sand Andren vnd andern Heiligen die in demselben gotzhaus Rastent sint, ainen Sechsten tail aus dem gantzen guot ze oberaygen ¹⁾ für rechtz freys ledigs aygen, besuocht vnd vnbesuocht mit allen nützen rechten Eren vnd gesuochen vnd dar zuo gehört oder do von chömm mügen vmb Achtzehenthalb phunt phenning. ie ainen Chraeuzer für drei phenning, der wier vns rueffen gwert gar vnd gantzleich. Wir schullen auch vnd vnserr erben dez vorgenanten Sechstentails aus dem vorgenanten guot, dez egenanten Gotzhaus gewer sein an aller der stat wo im dez not vnd durft geschicht, als dez lantz der graschaft do ez inn leit vnd rechtz aygens recht ist. taet wier dez nicht, ob dem oftgenanten gotzhaus dhain stoz pruch oder irrsalum von iemant dar an geschaech, ob im daz von vns nicht wirt austragen als recht waer swelichen schaden ez dez naem, den schüllen wier im ablegen gar vnd gantz, vnbered vnd vnberecht. swer dez gotzhaus phleger ist, sein ains trewn vnd worten dar vmb ze glauben an ayd. vnd schol ez den haben mit sampt dem Haeuptguot auf zwain phunt Iaerleichs geltz die wier im dar vmb ze rechten fürphant gesetz haben auf dem vorgenanten guot ze oberaygen nach dez lantzrecht Dez ze vrchund geben wier Ich vorgenantin Elspet vnd ich Iohans ir Sun dem obgenanten Goczhaus disen brief versigelt vnder Ortolfs graesweins Insigel im an schaden, dar vnder wier vns verpunden haben mit vnsern trewen für vns vnd für vnser erben als daz staet ze haben daz oben geschriben ist, wan wier selber an gevaer nicht Insiegel hieten. Dez sind zeug Nicla der Münchawer Chunrad der Ochsenperger ze Ekching, Chunrad der Aescharer, vnd ander erbrger laeut genuog. Datum Anno domini Millesimo ccc ^mo lxij ^o proxima Sexta feria post Purificacionem gloriose virginis Marie.

Source Fulltext: DOPPLER