Ich Anna die Pücherin Chlosterfraw ze Fuldepp ¹⁾ vergich für mich vnd für all mein Erben vnd nach chom Daz ich mit wolbedachtem muet vnd nach Rat Chaeufleich han ze chauffen geben Sand Andres Goczhaeus ze Chiczpühel vnd den pharrlaeuten da selb vnd allen ieren nach chom zehen schilling jarichleis vnd Ewiges gelcz ie ainen chrawczer für drei phenning auf dem guet genannt Harpeunt. ²⁾ daz leit ein Chiczpühler gericht. für lediges vnd freiez aigen vnd als ich Ez chaeufft han von Hainrich dem Maeuslein dem got genad. Vmb vierczehen Marich gueter Meraner münzz der ich von in dar vmb gericht vnd gewert pin gar vnd gancz vnd schol ich der vorgenanten gult aeuz dem guet ir gewer sein für einen ledigen gelt als dez landes da das guet in leit vnd Rechcz aigens Recht ist Taet ich dez nicht naemen si dez chainen schaden wie der genant wer den schol ich in ab tuen gar vnd gancz vnberet ier ains treun vnd wörten ze gelaeuben an aid vnd schullen Si daz haben auf aller meiner hab wa ich die han oder wie die genant ist piz auf volle gancze werung haeupt guet vnd schaden. Dez ze vrchunt gib ich in den prief versigelt mit des Conuencz ze Fuldepp vnd mit hern Chuenrat des Chumersprugker ³⁾ Jaegermaister in Obern Paigern anhangenden insigeln. die Si an den prief gehengt habent. durch meiner pet willen in an schaden. Dez sind zeug weichnant der Fuestamer Jacob der Hyngcher Chuenrat der Chamrer von Aeg vnd ander Erber laeut genueg. Datum Anno Domini M ^o ccc lxx vno in die festo Pentecosten.

Source Fulltext: DOPPLER