Ich Paertel der Welifshouer. vnd ich Katrein sein Hausfraw wir vergehen für vns vnd für all vnser Erben Daz wir mit gütem willen. durich vnsers lieben vater Chunrad dez Ascharer vnd Jacobs seins prüder vnd aller ir vodern vnd nachchom Sel willen. geben vnd bestaet haben zwai phunt phenning ie ainen chraeuczer für drei phenning. iaerichleis vnd Ewigs geltz auf vnserm güt genant Michel Aschar ¹⁾, zu ainem Ewigen Iartag, den wir oder vnser Eriben. all iar. da von begen schullen auf Sand Marteins Tag. ein den nachsten Acht tagen vor oder nach dacz sand Andres goczhaus ze Chiczpühel vnd schüllen daz tün die Erben di wir mit einander gewinen. Taet wir dez nicht. oder daz wir inder Saumich dar an weren oder an Eriben sturiben So hat dez vorgenanten goczhaus Chirichprobst wer der ze der zeit ist vollen galt (sic) sich der zwaier phunt geltz auf dem güt vnderwinden im an schaden vnd schol den vorgenanten Iartag da von begen nach der naechsten frumt Rat. an all vnser vnd Eriben widerred. Waer auer daz die all absturiben. So schol er ez tün nach dez Racz Rat ze Chiczpühel wer die ze der zeit sind. Vnd wurd an dem Iartag, vnd an ainer spent ich vber. daz schol beleiben dem selben goczhaus ein daz liecht So vergich ich Elspet Chunrad dez Ascharer witib daz daz geschehen ist mit meinem gütem willen. vnd schol all iar ein den Iartag geben in ze hiliff Sechczich phenning der selben münzz. die ich zaig vnd bestaet auf dem selben güt. auf meinem tail ein allen Rechten als vor geschriben stet Dez ze vrchund geben wir dem vorgenanten goczhaus den prief versigelt mit Hansen des Oechsenperger insigel im an schaden Dez sind zeug Lienhard der Altpegch Steffan Marbanger Heinrich Meilinger Chunrad Rudlant Dietel Oeder vnd ander Erber laeut genüg. Datum Anno domini M ^o ccc lxx in die omnium Sanctorum.

Source Fulltext: DOPPLER