Ich Nicla der Münichaewer. vnd ich Sann sein Hausfraew wir vergehen für vns vnd für all vnser Eriben. Daz wir mit guetem willen vnd nach Erber laeut Rat. Chaeufleich haben ze Chaeuffen geben. Hainrich dem Chaczman seiner hausfraeun vnd allen irn Eriben. die Agcher die ligent enhalben dez Anger Enhalben. der Padstuben zwischen des angers vnd der Leiten als ez gehört hat ein daz Ober guet ze Mitterhegel vnd als ez mit Marich vnd mit zaewn auz gezaigt ist. für ledig Aegcher Vmb vierczehen Marich meraner Münzz der wir von in dar vmb gericht vnd gewert sein gar vnd gancz. Vnd schullen wir der selben Aegcher ir gewer sein wa in dez nöt geschicht. als dez landes da si in ligent vnd lehens Recht ist. Taet wir dez nicht naemen Si dez chainen schaden wie der genant wer den schullen wir in ab tuen vnberet ir ains treun vnd worten ze gelaeuben an aid vnd schullen Si daz haben auf vnsern treun vnd dar zue auf aller vnser hab. Ez ist auch getaidingt. daz Si den zaewn der in mit Marich aeuz geczaigt ist dar zue zaeunen schullen. vnd schullen Si dar zue nemen holcz wez Si an geuer bedurffent. auz vnserm holcz ein der Gerten Dar zue haben wir in die selben aegcher aeufgeben. an daz goczhaus von Pabenberch. da von Si ze lehen sind in ze leichen als lehens Recht ist. Dez ze vrchund geben wir in den prief versigelt mit vnserm aigen anhangendem insigel des sind zeug Chuenrat ein dem Maurach. Vlrich der Schüchuriffel. Nicla Schafluczel vnd ander Erber laeut genüg. Datum Anno domini M ^o CCC. lxx. Secundo in die Marie Magdalene.

Source Fulltext: DOPPLER