Ich Hans der Räuter Pharrer ze Castaün vergich für mich vnd für mein nachomen daz ich all Iar Iärleich begen sol ein Iartag mit einer vigili vnd einer Selmeß alz gewonleichen ist an phintztag in den ersten vier tagen in der vasten dem erberen Herren Hern Hainreichen dem got genad weilent pharrer ze Casteün vnd Fridreichen Schauchsgav seinem prueder vnd andern iren voruordern, vnd sol ich vnd mein nachomen ir gedenchen all Suntag auf dem Letter mit andern gelavbigen selen an geuär, Vnd dar vmb hab ich von in enphangen sumphthalben schilling phenning geltz auf Radigunden der Röting hofstat, dev gelegen ist ze nachst nider dez eltern Christoffen Chaützel haus, Vnuertzigen der zway vnd dreizzig phenning gelt die ich vnd mein voruordern gehabt haben vnd noch haben dar auf, Vnd ain pfund gelts daz gelegen ist auf der Mül oben in dem Chirichpach ze Hof in der Castäun, Dez selben Iartags vnd gedächtnüzz verpint ich mich egenannter Hans für mich vnd mein nachomen stät zehalten vnd zeuolfüren alz oben verschriben ist an allez geuär Tät ich oder mein nachomen dez nicht in den obgenanten viertagen in der vasten so sol der vorgenant gelt auf der hofstat vnd Mül dez selben Iars dem gotzhaus angelegt werden, oder armen läuten getailt werden, nach der zechlaütt Rat daselbs vnuertzigen dez pharrer recht der andern Iar wand er ez redleich beget so sol auch der gelt gevallen an allez vertzichen Mit Vrchünd dez priefs der versigelt mit dez erbern herren hern Ortolf Techants ¹⁾ vnd Richter Gaisleicher sach ze Saltzburg Vnd meines liben vater Ortolfs dez Raüter purger ze Saltzburg anhangenden Insigeln, die ir Insigel durich meiner pet willen an den prief gelegt habent in an allen schaden wann ich ze den zeiten aigens Insigel nicht enhet Der geben ist an sand Giligen tag Do man zalt von Christi gepurd dreutzehenhundert dar nach in dem drev vndsibentzgisten Iar.

Source Fulltext: DOPPLER