Ich Hainreich der Graesler, puriger ze Salzburch, mein Hausfraw vnd all vnser eriben. Veriehen vnd tuen chunt offenbar an dem prief allen den di in sehent oder hörent lesen. das wir mit guetem willen vnd mit wolbedachten muot Recht vnd redleich ze chauffen haben geben. dem Ersamen Herren Hern Berichtolden dem Losenstainer. ze den zeiten Chorherr vnd pharrer ze Salzpurch vnd sein nachchomen. Ain Burchrecht. Haus vnd Hofstat. ¹⁾ das gelegen ist ze Salzburg. in der Huontsgazzen. ze nachst an dem haus. das der Tryenkchlinn was. vnd pei werntzleins des prieftrager haus saeligen. vnd das egnant purchrecht haben wir in geben vnd ingeantwuort. aus vnser nuetz vnd gewer in den ir besucht vnd vnbesuecht mit allen den Eren. rechten nuetzzen vnd gesuechen. die dar zue gehörent wie die genant sind. als wirs vnd vnser uodern inne gehabt vnd herpracht haben. an geuerd. vnd habent vns auch das selb Haus vnd hofstat gentzleich vergolten nach allen vnserm willen vnd an allen schaden, das wir vns sein ewichleich verzigen haben In der Beschaiden. das wir, vnser erben vnd nachchomen noch niemant von vnsern wegen hinfür darauf nichts mer ze sprechen schullen haben. mit Recht noch an reht noch mit dhainen sachen. an geuaer Vnd haben in es auch aufgeben vnd Richtig gemacht mit Gerichts hant Chuenrat des Taufchintz di zeit Richter ze Salzburg. also purchrechts recht ist vnd der stat da selben. Wir schullen auch des vorgnanten Burchrechts ir gewer vnd fürstand sein für all chrieg vnd ansprach. wa, oder wie oft in des not vnd duerft geschicht, also purchreht recht ist, vnd der stat ze Salzburg vnd schullen si das haben. datz vnsern trewn vnd auf aller vnserr hab. wa wir di haben inner Lants oder auzzer Lants wie di genant ist. an geuar. Vnd ze ainem Vrchuent der warheit geben wir in den prief, versigelt mit des vorgnanten Erbern mans Chunratz des Taufchinds Richter ze Salzburg anhangunden insigel. der sein Insigel an den prief hat gelegt durich vnserr vleizzigen pet willen im vnd sein erben an schaden. Dar vnder ich mich Hainreich der Graesler mein hausvraw vnd all vnser eriben vnd nahkomen mit vnsern trewn verpunten haben alles das staet ze haben vnd gentzleich ze volfüren das an dem prief stet geschriben. Der Sache sind zeugen vnd taydinger gewesen die Erbern Herren Her Hans der Häwsler, Chorherr ze Salzburg. Her Eberhart tagmezzer Her Dietreich Chapplan. vnd Her Larentz Spitaler vnd gesellen der pharr da selben. vnd Vlreich der Wechslaer. vnd maister Ott der Smyd. puriger ze Salzburg vnd ander Erber läutt. Der prief ist geben an sant Philipps vnd sant Jacobs tag uach christi gepurd dreuzehen Hundert Iar vnd dar nach in dem sechs vnd Sibentzkstem iare.

Source Fulltext: DOPPLER