Herzog Rudolf IV. bestimmt die Pönfölle für diejenigen, welche die Leute, die zu der von ihm in der Burg zu Wien zu Ehren Allerheiligen gestifteten Kapelle gehören, in ihren Freiheiten beirren werden: Wir Rudolf von Gottes gnaden Hertzog ze Österreich … allen Christan Leuten ewicklich vnsern grus vnd dise nachgeschribne vnser ordnung selichlichen ze behalten. Wan menschlich natur an ettlichen Leuten auf leiplich Wollust ze weltlicher Verlazzenhait, also vast genaigt ist, daz die selben Leut vnderstunden vergezsent des inflizzes göttlicher Vernunft vnd Christenliches gehorsam, darumb zimt wol Fürstliche wirdehait, die vnser Herre, der allmeclitig Got darzu geordnet vnd gesetzet hat, daz si solich vnwizzentlich Volch mit leiplicher Chestigung vnd mit weltlichem gewalt darzu nöte vnd bringe, daz dieselben Leut nicht allain götliche Werch vnd Christanliche Sazung, die vor in geschehen sint, halten, sunder daz si hinzu geweiset werden von der irrung ir vichlichen vnerchantnuzze vnd chomen auf den Weg der Warheit, also daz si begreiffen die gnade göttlicher Vernunft vnd christanlich gehorsam nach Willen dez almechtigen Gottes, von dem aller menschen ewichait geflozsen ist, der vns nach seiner pildung lieplich vnd gnedichlich geschöphet hat. Nu wizzen alle Leut vnd besunder die, den ez ze wissen durft geschicht, daz Wir mit gutem Willen vnd gunst dez hochgeporn Fürsten unserns hertzen lieben Herren und Vatters herrn Albrecht herzogen und herren der vorgenanten Lande nach guter vorbetrachtung, von besundern Gnaden auz vnserm Fürstlichen gewalt mit aller der Ordenung, beschaidenhait vnd Chrafft, worten vnd geberden, geistlicher vnd weltlicher rechten, nach Fryehait, recht vnd gewonhait vnsers Landez ze Osterrich solich Fryhait, recht vnd gnade getan vnd geben haben, recht vnd redlich tun vnd geben auch mit disem prief fur Vns vnd aller vnser nachkomen vnd erben ewichlich in Gottes namen der Chappellen Vnser neuwn Stift ze Wienn in vnserm turne nebent Widmertor, die Wir in aller heiligen ere gepawen vnd bewidemt hahen, were daz yeman die Chapplan vnd holden, die ietzund zu derselben Chappellen gehörent vnd ouch die hernach iemer darzu gehören werdent, wa die in alien vnsern Landen oder anderswa gesezsen vnd wie si genant sint oder werdent, angriffe frevenlich oder si anviele vnd vienge, oder beschedigette vnd irrete an iren leiben an irn Guttern an den Freyhaiten rechten vnd gnaden, die Wir in vormals geschriben vnd geben haben oder dhains andern Weges ane Recht, daz der oder die, die solchen übermut vnd vnrecht geben zu puze vns vnd vnsern nachkomen vnd erben an dem Herzogentum ze Österrich zehen March Goldes vnd dem obristen Chapplan der egenanten Chappelle fünf march goldes. Ist er aber ain dienstherre oder ain dienstmann oder von ain Schilt, so soll er vns in dem namen als davor, geben zehen march goldes vnd dem Chapplan drey march goldes vnd waz darnach puriger vnd ander Leut in allen vnsern Stetten, Merchten vnd Lannden oder anderswa gesezsen sint, die sullen dieselben pezzerung tun vns in dem namen als davor mit siben marchen goldes vnd dem Chapplan mit zwain marchen Goldes. Und daruber sol iederman, der in diese Schulde vallet, er si Graf, Frye, Dienstherre, Dienstmann, puriger oder ander Leut, wie sie genant sint, dem oder den, die sie anvallent vnd beschedigent ane Recht, als vor beschaiden ist, ablegen vnd wider tun vollenchlich vnd genzlich allen den Schaden, den si in danen getan habent, daruber sei, noch werde nieman als geturstig noch als übermitig, der die vorgenant unser gesazt allechlich oder bei teilen widerrede oder dhains wegen übervare, wan wer vns dieselben unser ordenun giemer verbrichet, der wizze nicht allein Gottes vnd aller heiligen zorn damitte verschulden an Sel vnd an Leib, sunder daz er auch dartzu vnser Fürstlichen Wirdechait also erzürnet, das er in vnser vnd in aller vnser nachkomen vnd erben chünfftiger hertzogen ze Österrich Vngnade vnd sware Veintschafft hertichlichen vervallet. Mit Vrchunt ditz prieft, der geben ist ze Wienn am Sambstag nach Sant Pancracytag, da man zalt nach Gottes Gepurt tusent dreu hundert funfzig Jahr vnd darnach in dem sibenden Jare vnserr gebürtlichen zeit in dem achtzehenden Jare.