Wir Maximilian von gotes genaden Erwelter Römischer Kayer … Bekennen offennlich mit disem Brieue, dass wir dem Paulsen von Oberstain Thumbbrobst zu Wienn Obristen Canntzler des Erzhertzogthumbs zu Österreich vnnd der Vniversität daselbs zu Wienn vnnserm Rat vnd Secretarien diese besondern gnad getahn, Vnnd Ime vnnd seinen nachkomen Thumbbrobsten vnnd der Thumbbrobstey zu Wienn dises nachgeschriben Wappen Mit Namen ain Schildt in der mitte nach der lenng gleich getailt, das vorder über Zwerch in drey gleiche stuckh getailt, nemblich das vnnder vnnd ober Rot, vnnd mitter Weis oder Silberfarb vnnd hinndertail nach der lenng auch in drey strassen gleich getailt vnnd vorder weis oder Silberfarb vnnd die mitter Rot. Vnndt auf dem Schildt ain schöne wehetzierte Bischofliche Imffel vnnd vber Egg dar Inn ain Bischof Stab, Alssdann dasselb Wappen mitsambt der Imffel vnnd stab in mite ditz gegenwürtigen vnnsers kayserlichen brieffs gemalet vnnd mit Farben aigentlicher ausgestrichen sein von newen genedigclichen verlihen vnd wellen das derselb Pauls von Oberstain vnnd alle seine nachkomen ewigclichen das vorgemelt Wappen haben vnd die neben Irn Erblichen wappen oder in ainem quartierten Schildt oder allain füern mügen. Vnnd das obenannter von Oberstain Thumbbrobst noch mer empfind vnnser kayserlichen miltigkait zu geniessen. So geben wir Ime von egemelter vnnser kayserlichen macht diese Freyhait, dass er vnnd sein nachkomen vnd hinfür all vnnd yeglich beflossen vnnd offen brieue von Inen oder anndern vnd Iren anhanngennden oder aufgedruckten Insigln oder Petschaften ausgeen mit feinem Roten wachs versiglen vnnd sich des also an allen ennden gebrauchen mügen vnd gebieten darauf allen vnnd yeglichen vnnsern vnd des heiligen Reichs Churfürsten vnnd sonst allen anndern vnnsern Vnnderthanen vnnd wellen das Sy den obgenannten Paulsen von Oberstain Thumbbrost zu Wienn vnd seine nachkomen zu ewigen Zeiten an den obgemelten Iren wappen vnnd den berürten Iren gnaden nicht hindern, als lieb ainem yegclichen sey ain Peen Nemblich fünffzig Marckh lötiges goldes zu uermeiden. Mit Vrkundt ditz briefs besigelt mit vnnserm anhanngenndem Innsigl. Geben in vnnser vnd des Heiligen Reichs Stat Augspurg am Newntzehenden tag des Monats Septembris 1516 vnnser Reiche des Römischen im ain vnd dreissigisten vnnd des Hungerischen im newen vnd zwaintzigisten Jaren.