++ In nomine sancte et individue trinitatis. ++ Eberhardus dei gratia Salzburgensis ecclesie archiepiscopus, apostolice sedis legatus, universis Christi fidelibus salutem imperpetuum. Cum ex pontificali atque pastorali officio, quo licet immeriti deo auctore fungimur, omnium ecclesiarum utilitatibus deservire teneamur, caritatis tamen officio precipue matrici ecclesie pontificatus nostri obnoxii sumus, cuius titulo honoramur et cuius regulis et institutionibus relique per universam diocesim nostram tamquam maternis uberibus et pascuntur et reguntur. Inde est, quod universitati fidelium^a) tam futurorum quam presentium significamus, quod quedam honorabilis femina Diemu/odis nomine ministerialis ecclesie nostre in presentia nostri et cleri nec non ministerialium atque reliqui populi utriusque sexus protestata est, se partem prediorum suorum una cum viro suo Meingoto Salzburgensi castellano, qui tunc diu de medio sublatus fuerat, in maiori ecclesia temporibus felicis memorie domini Alberti archiepiscopi predecessoris nostri super altare sancti Rv/oberti delegasse in usus canonicorum ibidem deo servientium. Nos igitur veritatem huius protestationis sive confessionis sollicita indagatione perquirentes invenimus per instrumentum memorati domini Alberti archiepiscopi, quod iam dictis canonicis super eadem donatione contulerat et vivorum testium, qui adhuc superstites erant, attestatione ita esse sicut domina Diemu/odis confessa fuerat. Enim vero nobis ita omnibus circumstantiis ad serenitatem veritatis spectantibus prosequentibus cum omnia vera invenissemus, iam dicta femina zelo iusticie ducta prefato Meingoto sicut diximus de medio sublato metuens eiusdem viri sui suamque delegationem defectu testium obeuntium infirmari, postulavit a nobis delegationem ipsam atque Privilegium archiepiscopi Adalberti predecessoris nostri privilegio nostro roborari et testium augmentatione confirmari. Cuius piis peticionibus annuentes prefatam donationem coniventia nostra roboravimus et nomina singulorum prediorum secundum pristinam traditionem huic cartule inscribi fecimus. Hegiln videlicet et munitionem suam totam cum curte et mansis omnibus, ad ipsam domum pertinentibus, cultis et incultis, quesitis et inquirendis, cum foresto et quatuordecim vineis tam Hegiln quam Chv/onliten sitis et agris ad culturam vinearum pertinentibus et cum omnibus propriis hominibus Hegiln pertinentibus exceptis militibus tali pacto, ut post mortem amborum hec traditio rata sit si sine herede de hoc seculo migraverint. Si vero ipse de alia uxore vel ipsa de alio marito prolem habuerit, ad hunc heredem nichil de hiis pertineat, sed stabiliter delegatio facta maneat in perpetuum. Item aliud predium Taecgingen tali forma tradiderunt, ut post obitum utriusque proprietas perpetua esset ecclesie sive heredem acquirerent sive non acquirerent. Aliud quoque predium simul tradiderunt Waltprehtingen scilicet villam totam cum quinque molendinis et mancipiis ceterisque pertinentiis. Nec illud latere volumus, quod idem predium Waltprehtingen videlicet Heinricus de Sêchirchen ministerialis ecclesie prius in extremis suis predictis fratribus pro anima sua tradidit post mortem uxoris sue Livtgarde de Schoenberc, set predictus Meingotus et uxor sua Diemvdis post mortem prefate Livtgarde de eodem predio iure vel potius occasione consanguinitatis se intromiserunt. Quam querimoniam deo inspirante prudenter et religiose non solum terminaverunt, set insuper multa bona contulerunt tali modo, ut omnia prefata predia post mortem eorum secundum prescriptam rationem ecclesie devenirent hoc excipientes, ut quamdiu ipsi viverent numquam a predictis fratribus querimonia de predio illo Waltprehtingen pulsarentur. Nos autem, tantam devotionem ad utilitatem ecclesie nostre debito clementie et congratulationis affectu amplexantes, predictam traditionem ratam esse volumus et auctoritate nostra corroboramus in perpetuum. De quibus omnibus hii testes asciti sunt: dominus Albertus maioris ecclesie prepositus, Willehelmus decanus, Hoholdus diaconus eiusdem ecclesie canonicus, Otto prepositus de Werde, Poppo Aquilegiensis prepositus, Cv/onradus de Svlzowe, V/olricus prior de sancto Petro, Heinricus monachus, Siboto de Svrberc frater prenotati Meingoti, Otto de Steveningen et filius eius Otto, Otto de Goldecge, Albertus de Hartschirchen^b).||
Acta sunt hec Salburch^c), dominica palmarum, anno incarnationis||
domini millesimo CC°IIII°, indictione VII^a, anno vero pontificatus nostri||
IIII°, presidente autem Romane ecclesiae Innocentio III°, de regno vero||
contendentibus Philippo et Ottone; amen.||
S.^d)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 57-58.