++ Honorius ++ episcopus servus servorum dei venerabili fratri . . Salzburgensi archiepiscopo salutem et apostolicam benedictionem. Iustis petentium desideriis dignum est nos facilem prebere consensum et vota, que a rationis tramite non discordant, effectu prosequente complere. Significasti siquidem nobis, quod cum quidam abbates et prepositi regulares tue provincie in ecclesiis baptismalibus et parrochialibus non plene pertinentibus ad eosdem instituissent contra Lateranensis statuta concilii monachos et canonicos regulares, qui viventes irregulariter multa illicita committebant in salutis sue dispendium opprobrium ordinis et scandalum plurimorum, tu volens morbo huic congruum remedium adhibere, de suffraganeorum tuorum ac aliorum virorum prudentum consilio in plena sinodo provide ordinasti, ut abbates et prepositi regulares in talibus ecclesiis diocesanis episcopis presbiteros representent, qui eisdem episcopis de plebis cura respondeant eis vero de rebus temporalibus rationem exhibeant competentem, prout in concilio Lateranensi statutum et super in generali extitit innovatum. Unde nobis humiliter supplicasti, ut hec apostolico dignaremur munimine roborare. Nos igitur tuis iustis precibus grato concurrentes assensu quod per te super hiis est auctoritate apostolica confirmatum est, presentis scripti patrocinio communimus. Nulli = n° 707 = incursurum. Dat. Lat. XVIIII kal. ianuarii, pontificatus nostri anno secundo.||
B^a)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 231-232.