Honorius episcopus servus servorum dei venerabilibus fratribus universis episcopis et dilectis filiis abbatibus prepositis prioribus et aliis ecclesiarum prelatis per Salzburgensem provinciam constitutis salutem et apostolicam benedictionem. Qui honoris sui student ministerium honorare illud laudabiliter exequendo, merito sunt ab aliis honorandi, ut virtus suis titulis elucescens ad imitationem sui emulatione laudabili quoslibet alliciat et invitet. Nec est reputandus virtutis amator^a), sed potius persecutor, qui virtuosis, in quibus tenetur, obsequi aspernatur. Sane cum venerabilis frater noster . . Salzburgensis archiepiscopus ex officii sui debito habeat Salzburgen(sem) provinciam visitare, universitatem vestram monendam duximus et hortandam per apostolica scripta mandantes, quatinus, cum ex rationabili causa provinciam ipsam eum visitare contigerit, vos cum honore debito recipientes eundem in hiis, que ad officium suum pertinent, ei sicut convenit intendatis, ut ipso suas et vobis vestras partes laudabiliter adimplentibus ecclesie vestre spiritualibus et temporalibus auctore domino proficiant incrementis et nos eius sollicitudinem et vestram devotionem debeamus merito commendare. Dat. Lateran. III idus decembr., pontificatus nostri anno secundo.||
B.^b)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 229.