+ C. ++ In nomine sancte et individue trinitatis. Ebehardus^a) dei gratia Salzburgensis archiepiscopus, apostolice sedis legatus, in perpetuum. ++ Multis et gravibus obviamus incommodis, cum ea, que nostris geruntur temporibus, ne cum fluxu temporis in oblivione defluant, litterarum vivaci memorie commendamus. Eapropter ad noticiam omnium fidelium transmittimus, quod nos obeunte Heinrico de Lîebenz ministeriali ecclesie Salzburgensis decimas, que ab antiquo in decimariis curiis in Cirkeniz et Iaering et Sakkach colligi solebant et colliguntur hodie, sicut idem miles a manu nostra et predecessorum nostrorum habuerat et post mortem eius ad nos redierant, canonicis * ecclesie nostre tradidimus iure perpetuo possidendas hoc firmiter statuto, ut, cum fratribus hactenus cappe nude et simplices darentur de proventibus illarum curiarum, de reliquo dentur subvestite cum pellibus agnellinis nec tamen de vestibus, quas antea recipere solebant a camerario, quicquam eis huius occasione commodi minuatur, et ipsi vice illius emolumenti post obitum nostrum ad altare, quod fundandum erit iuxta sepulturam nostram, ebdomedarium^a) ad missam defunctorum continue habeant, cuius prebenda par sit prebende cantoris. Verum quia propter multam locorum distantiam proventus predictarum decimarum canonicis ad plenum raro persolvebantur, nos provida consideratione donationem nostram commutavimus, hoc scilicet modo, ut easdem curias decimales, Cyrkeniz videlicet Iaering et Sakkach dominicalibus nostris asscriberemus et vice ipsarum ecclesiam Castu/one fratribus nostris iure perpetuo traderemus^b) possidendam statuentes, ut sacerdoti et cooperatori suo de proventibus eiusdem ecclesie honestum et competens assignent stipendium, reliqua vero in usus cedant canonicorum. Preterea predia in Karinthia iuxta Frisacum sita, videlicet apud sanctum Stephanum cum omnibus suis pertinentiis et foresto, que a nobili viro domino Heinrico de Vilalt emimus¹⁾, cum omni integritate omnium proventuum ad idem predium pertinentium sepedictis canonicis contulimus in perpetuum possidenda, firmiter statuentes, ut eadem predia sub defensione nostra et successorum nostrorum permaneant ab omni exactione emancipata, ita ut nec nos nec aliquis successorum nostrorum habeat potestatem advocatiam eorundem prediorum ad manum laicam aliquo modo transferre. Provida autem deliberatione ordinamus, ut tam de proventibus ecclesie Castu/one quam etiam de prediis ad sanctum Stephanum cappe * canonicorum certo^c) tempore^d) agnellinis pellibus subvestiantur et missa pro defunctis ad altare iuxta nostram sepulturam in^e) perpetuum celebretur et sacerdoti illam celebranti^f) in lauciori prebenda de communi provideatur, de residuo autem tribus personatibus subdecano^g), scolastico et cantori^h) provideatur et dies anniversarius noster in procurationeⁱ⁾ tam congregacionis quam pauperum, sicut ordinavimus, celebretur et mandatum trium^k) pauperum singulis diebus peragatur et septem luminaria de sepo in maiori^l) ecclesia singulis noctibus accendenda preparentur et esoces ante Natale domini, quando maiores^m) antiphone cantantur, ad procurationem fratrum comparentur. Ne autem hec nostra donatio et donationis ordinatio commutari a quoquam possit in futurum, presentem inde paginam scribi et sigilli nostri autentico communiri iussimus.||
Data apud Salzburch, II kal mai, indict. XI^a, anno ab incarnatione domini M°CC°XX°III°, pontificatus vero nostri anno XX°III°.||
SD.ⁿ⁾

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 307-308.