In nomine sancte et individue trinitatis. Eberhardus dei gratia Salzburgensis archiepiscopus, apostolice sedis legatus, in perpetuum. Quia quod olim ad utilitatem ecclesiarum conmunem de advocatis fuerat institutum, ut eorum defensione bona ecclesiarum consisterent tutiora, temporibus istis hominum crescente malicia in contrarium est conversum, nos consulere cupientes in parte gravaminibus dilectorum in Christo fratrum nostrorum prepositi et capituli Salzburgensis, que occasione advocatorum sustinere coguntur predia ministerialium ecclesie Heinrici videlicet de Sechirichen, Heinrici et filie eius Dimudis de Hegel, Meingoti de Surberch, et possessiones in Wizbachsowe, quas nos ad petitionem Chunradi purcravii, qui easdem habuit in feudo et nobis resignaverat, capitulo in proprium contulimus et bona etiam, quorum advocatiam Heinricus de Nohstein habebat, sine iure percipiendi emolumentum aliquid in nostram protectionem recepimus specialem hoc adiecto, ut nos in futurum omnes possessiones, que ad nos legittime fuerint devolute, sive iam habeant advocatum sive de novo ecclesie accreverint, in nostra protectione similiter teneamus, statuentes, ut nec nobis nec successoribus nostris predicta bona liceat dare laice defensioni in feudo sed ad petitionem dumtaxat capituli temporales ibi ponere defensores. Ut igitur hec firma et inconvulsa consistant, presens instrumentum inde confectum sigillo nostro concessimus roborari.

Source Fulltext: Salzburger Urkundenbuch, III. Band. Urkunden von 1200 bis 1246. Willibald Hauthaler und Franz Martin. S. 368.