H(einricus) dei gratia Rom(anorum) rex et semper augustus universis imperii fidelibus, quibus presens scriptum exhibitum fuerit, gratiam suam et omne bonum. Cum nos, qui gubernamus imperium regia potestate, sepe temporalium occupationibus negociorum rapiamur temporaliter in diversa, ut adversa deo propicio in mundanis nobis in prospera convertantur, ad ecclesiarum tranquillitates ordinandas ob reverentiam divinam desiderantius aspiramus. Auditis itaque querelis Salzpurgensis ecclesie simul et Gurcensis super iure regalium in auditorio divorum parentum nostrorum et magnorum principum aliorum, quid inde statuerint ante tempora nostra sententie dictate et edita statuta per scripta declarant. Cum autem eandem questionem nostris temporibus iterum contigerit suscitari, coram reverendo patre nostro sancte Romane ecclesie Gregorio summo pontifice Gurcensis episcopus super eodem iure Salzpurgensem archiepiscopum traxit in causam.¹⁾ Verum licet eidem sanctissimo et patri spiritali omnia parere debeant in suo iure et nos obsequia nostra debeamus et velimus eidem exhibere, ad nos tamen specialiter salva reverentia sua pertinere dinoscuntur huiusmodi questiones, a quibus feo/vda regalium processerunt. Unde presumimus vehementer, quod propter nimiam suam occupationem iure nostro neglecto dictam questionem susceperit terminandam, quasi ad se veraciter pertinentem vel forte pars Gurcensis episcopi, quod feodum esset, non fecerat mentionem. Et quoniam sumus ubique iuris apostolici^a) defensores, contra nos iniurias prodire inde non poterimus suspicari, unde iura evidentissima manare deberent. Dicimus ergo secure, quod secundum scripta parentum nostrorum videlicet magne memorie Friderici imperatoris et serenissimi patris nostri et aliorum principum Romanorum memoratum ius regalium feodum esse dinoscitur a predecessoribus^b) nostris profectum, pro quo Salzpurgensis archiepiscopus cum Gurcensi episcopo contendit, et eo ipso feudo Salzpurgensem archiepiscopum et suam ecclesiam a predecessoribus nostris iam dudum recognoscimus infeodatum. Et ad maiorem evidentiam presens scriptum sigillo nostre celsitudinis roboratum cum testibus subnotatis, quibus rei veritas constat premissorum, exhiberi precepimus archiepiscopo memorato. Testes hii sunt: H(ermannus) venerabilis Herbipolensis episcopus,L(iupoldus) et L(udowicus) Austrie et Bawarie illustres^c) duces, comes H(artmannus) de Dilingen, comes E(geno) de Vrah, comes R(upertus) de Castele, burgravius C(onradus) de Nurinberc, G(erlacus) de Butingen, F(ridericus) de Druhendingen, comites de Helfenste[in], E(berhardus) dapifer de Walpurc, C(onradus) pincerna de Winterstete, C(onradus) de Smideuelt et alii quam plures. Datum apud Nordelingen, anno domini M°CC°XX° octavo, VIII° idus septembris, indictione prima.||
S.^d)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 365-366.