Nos Fridericus dei gracia dux Austrie et Stirie et dominus Carniole hoc scripto patere volumus universis tam presentibus quam futuris, quod * Heinricus pincerna noster de Habespach proprietatem castri Lichtenberch cum omnibus suis attinentiis, hominibus videlicet et possessionibus cultis et incultis, quesitis et non quesitis dilecto domino et amico nostro Eberhardo venerabili Salzburgensi archiepiscopo sueque ecclesie pro quadringentis^a) marcis argenti Wienensis ponderis et * redditibus decem marcarum scilicet de redditibus officii apud Leibentz * tradidit ad emendum eidem pincerne similiter promittendo decem marcarum redditus de bonis infeodatis, quantocius in partibus Marchie sibi vacare ceperint, feudi titulo collaturum. Ipse vero pincerna sepedicti domini nostri sueque ecclesie Salzburgensis omnium bonorum et hominum eidem castro attinentium promisit esse auctor, quod gwer vulgariter appellatur, hoc adiciens, quod ab omnibus et singulis inpetitoribus ipsum castrum cum omnibus pertinentiis Salzburgensi ecclesie de iure tuebitur et deffendet^b), ceterum si forte piucernam Heinricum, antequam reciperet prenotate pecunie quantitatem subtrahi contingeret ab hac luce, * fratri pincerne Vlrico assignanda erit tota pecunia supradicta, ut eandem convertat ad usus filie sui fratris, quam pincerna de nostro consensu et bona voluntate in familiam tradidit ecclesie Salzburgensi matrimonialiter copulandam, hoc etiam promittendo, si eadem filia fratris sui ante matrimonialem copulam decederet, quatenus filium Vlrici fratris sui * in familiam Salzburgensis ecclesie apud nos debeat obtinere. Et ut omnia et singula prenotata, memoratus pincerna noster teneatur perducere ad effectum, excommunicacioni domini pape et domini nostri Salzburgensis archiepiscopi voluntario se subiecit, ita etiam nisi omnia attenderet antedicta, quod universa bona ubicumque sita fuerint, subiecta sint ecclesiastico interdicto. Nos vero ad peticionem ipsius pincerne, nec non pro evidenti testimonio omnium predictorum hanc paginam sigillo nostro iussimus roborari. Sunt etiam huius rei testes: R(udigerus) Patau(iensis) episcopus, Vl(ricus) Secovi(ensis) electus, H(einricus) plebanus de Graetz, H(ertnidus) de Bettow(ia), Vl(ricus) dapifer de Lieht(enstain), W(lfingus) de Libentz, C(hunradus) de Horneke et alii quam plures. Dat. huius ap(ud) Neunstat, anno domini M°CC°XL°IIII°, indiccione secunda.||
S.^c)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 583-584.