Eberhardus dei gracia Salzburgensis archiepiscopus, apostolice sedis legatus, omnibus presentem paginam inspecturis salutem. Noverint universi, quod dominus Wlfingus de Leibenz ministerialis noster decem hu/obas aput Erenprehtesdorf, que sibi ex hereditate matris per dominum Ottonem de Chungesberch suum avunculum accesserunt, capitulo nostro pro marcis octoginta argenti ponderis Frisacensis tradidit pleno iure nulli venditum vel etiam loco pignoris obligatum, idem predium in nostris manibus resignando ita, quod nos proprietatem eiusdem nostro capitulo assignemus, cum talis vendicio sine voluntate nostra et consensu perduci non poterat ad effectum. Ne autem heredes sui vel coheredes in futurum super hoc aliquam moveant questionem, dominum Hertnidum de Betowe nepotem suum nobis pro centum marcis argenti Frisacensis ponderis obgavit^a) tali condicione adiecta, quod a festo Iohannis baptiste proxime venturo per annum per litteras et sigilla fratris et sororum suarum probabit, quod ipsorum consensus accesserit et voluntas. Quod si non fecerit, dictus H(ertnidus) pro memorata peccunia nobis tenebitur obligatus, nisi antedictus Wl(fingus) per alios fideiussores ipsum eximat vel sufficientem aliam caucionem. Acta sunt hec anno domini M°CC°XLV°, apud Frisacum, pridie non. aprilis. S.^b)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 615.