Wir Ruodolf von gotes gnaden ertzpischolf von Salzburch legat des stu/ols ze Rome veriehen an disem brief und tu/on allen den chunt, di in ansehent, daz nah Albers de Walhers tode da zwischen uns einhalbe und siner leutte an der chinde stat anderhalbe taydinch waren umb unser baider reht an vesten und an urbar, des chomen wir so uber ain: Des ersten umb den tayl der purige daz Chapprunne, den der vorgenant Walher von uns inne het, den sol man uns ze hant in antwrten auf sogetan rede. Swanne deu chint nah drin iaren von der næhsten liehtmesse di chost und di arbeit, di ir vater und ir vetern dar auf gieng, daz si den tayl der purch hulfen dem gotshous in zegwinnen, an uns vodern, daz wir die dar nah iner einem halben iar in sullen ablegen nah der sechser rat hern Hainriches des tu/ombrost von Salzburch, Chu/onen von Gu/otrat, Otten und Chunrates von Goldekk, Chunrates von Wartenuels und Gebhartes von Velwen und ob di sechs missehelent swem danne unser bru/oder pyscholf Chunrat von Chyemse gehilt, dem rat sullen wir volgen, und ob der siben iemen strube^a) in der vrist oder niht chomen mo/eht, an des stat sullen di lenbendigen^b) einen andern welen der chinde vreunt und wær des pyscholfes von Chiemse niht, so sei nahchoine an siner stat. Darnach sol uns beliben leutt und gu/ot, di uns der Walher ledig lie bi sinen lebentigen ziten, also ob uns diu chint dar auf dahaines^b) iers rehtes ermanten, daz wir in daz erchennen nah der siben vorgenanten rat. Darnah umb Liehtenberch ist ez also gesetzzet, daz di Gebhart von Velwen auf sin triwe sol innemen ze behalten dem gotshaus und dem lande und den chinden an schaden ze sechs iarn und sulen di chint in den sebs iaren zu uns chomen hintz Salzburch und sulen mit den vorgenanten siben und mit herrn Ortlieb von Walde und mit andern ir vreunten uns ihr rehtes, des si iehent auf di vorgenanten purch, und unser gnaden ermanen und werde wir da umb di selben burch mit ein ander niht verihtet, so sol Gebhart von Velwen ze hant nah dem sehsten iar den chindern di burch antwrten auf unser baider reht alz ez heut stêt. Und des got niht geb, ob Gebhart niht enwær, so sullen wir zwen welen und sol man von der chinde wêg zwen welen und sulen di vier auz den drin Chv/onen von Gu/otrat, Otten von Goldekk und Chunraten von Wartenuels einen andern welen, der di burch di vrist in den selben sætzzen und in dem selben reht behalt. Ez sullen auch der chinde leutte den lantvride loben mit ir triwen und swer den breche, den sol der Velwer und di andern leute, di wir im alle enpfhelhen dar zu/o twingen, daz er dem lande reht si und sulen di leute im gehorsam sin ze scherm lant und leute vor vromedem gwalte. Wir loben auch daz den selben leuten, daz wir ir oberister schermer wellen sin, di weil si uns gehorsam sint. Und sullen dise vorgenanten sætzze weder uns noch den chinden an andern sachen dahain schaid^b) sein. Und daz dise sætzze als si zwischen uns verschriben sint, stæt und unzebrochen beleiben, so haben wir unser insigel und unsers capitels und der siben vorgenanten insigel an disem brief gehangen ze einem waren urchu/ende. Und ditz ist geschehen und verschriben datz Celle in dem Pyntzgowe, do von Christes gebu/erde warn tausend iar zwai hundert und siben und ahtzk iar des næhsten midichen vor der liehtmesse.||
S.^c) S.^d) S.^e) SD. S.^f) S.^g) SD. SD. S.^h)

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 166-167.