Leo^a) episcopus servus servorum dei reverentissimo et sanctissimo fratri Arnoni archiepiscopo ecclesiae Iuvauensium, que et Petona nuncupatur, provinciae Baiovuariorum. Officium sacerdotis adsumere, si interiori vigilantia perpendamus, plus est oneris quam honoris, quippe cui propria curare non sufficit, nisi et salubriter gesserit aliena; nam ad hoc pastoralis regiminis curam adgreditur, ut aliorum in se sollicitudinem pia provisione suscipiat et in eorum sese custodia vigilanter disponat, ut lupus insidians possibilitatem in eo inrumpendi non habeat nec lesionem ovibus inferat. Sic qui animarum curam suscepimus, assiduam debemus sollicitudinem exercere, ut callido antiquoque humani generis inimico aditum percludamus et totis contra eius voracitatem^b) viribus obsistamus, ne nostra forte desidia rabida, quod absit, quemque fauce deglutiat et eius ad nostram non inmerito adplicetur penam perditio, qui commissis sollicita custodire cautela neglegimus. Exhibeamus ergo quod dicimus, et quibus divini dispensatione consilii preesse contigit, prodesse quantum possumus festinemus, ut dum creditor rationes positurus nobiscum advenerit, lucrum nos fecisse repperiat et sua nos sicut promisit remuneratione letificet. Hoc itaque, frater karissime, considera et locum quem adeptus es non ad requiem, sed ad laborem te suscepisse cognosce. Adhortationis ope fidelium corda corrobora, infidelium vero summopere converte. Quod ut facilius adsequi merearis, predicationem tuam vita commendet; ipsa eius instructio^c), ipsa magistra sit, ad desiderium aeternae vitae docente suspirent, tuo viventes exemplo perveniant; temporalia despiciant et que transitoria^d) sunt contempnentes ad ea semper, que nullo fine clauduntur desiderantes anhelent^e). In Ins igitur studium adhibe, in his tota intentione mentis persiste, quatinus dum tua predicatione atque imitatione haec fuerint consecuti, tanto maiora a deo nostro recipias, quanto congrua sollicitudine lucrandis animabus ei^f) officii tui excerere operam minime destitisti. Pallium preterea iuxta antiquam consuetudinem fraternitati tuae dedimus, quod^g) ita uti memineris sicuti predecessores nostri tuis predecessoribus concessere, privilegiorum scilicet tuorum integritate servata, ut a sacrario usque ad sacrum altare et ab altare usque ad sacrarium ipsum pallium^g) uti debeas. Fidem autem fraternitatis tuae, quam breviter nobis edixisses, tamen subtiliter debuisses exponere, verumtamen laetamur in domino, qui eam^h) rectam esse ex solemnis symboli confessioneⁱ⁾ didicimus. Preterea pervenit ad nos, quod sacri ordines in illis partibus cum datione commodi conferantur; quod si ita est, flens dico, gemens denuntio, quia cum sacerdotalis ordo intus cecidit, foris quoque diu stare non poterit. Scimus quippe ex evangelio, quid redemptor noster per semetipsum fecerit, quia ingressus templum cathedras vendentium columbas evertit; columbas enim vendere est de spiritu sancto, quem dominus omnipotens consubstantialem sibi per inpositionem manuum hominibus tribuit, commodum temporale percipere, ex quo predixi iam malo inbuitur quid subsequitur, quia qui in templo dei columbas vendere presampserunt, eorum deo iudice cathedrae ceciderunt, qui videlicet error in subditis cum augmento propagatur; nam ipse quoque qui ad sacrum honorem perducitur, iam in ipsa provectus^k) sui radice viciatur, paratus est aliis venundare, quod emit. Et ubi est, quod scriptum est: Gratis accepistis, gratis date, et cum prima contra sanctam^l) ecclesiam simoniaca heresis sit exorta, cur non perpenditis, cur non videtur, quoniam eum quisque (quem) cum pretio ordinat, provehendo agit ut hereticus fiat? Pro qua re ammoneo atque obtestor, ut omnino debeas esse sollicitus, ut nil sibi commodi datio, nil gratia, nil quarumlibet supplicatio personarum in sacris ordinibus vindicet, sed ille ad hoc officium perducatur, quem morum gravitas commendat et actiones. Quod non credimus fieri; si tale aliquid senserimus, canonica illud ut dignum est severitate corrigimus. Oramus autem omnipotentem deum, ut sua te munitione circumtegat^m) et sacerdotii susceptum officium operibus implere concedat.||
Scriptum per manum Eustachii notarii in mense april., indiction. VI. Bene vale.||
Data epistola XII. kal. mai. per manum Pascalii primicerii sanctae sedis apostolice, regnante domino nostro Iesu Christo cum deo patre omnipotente et spiritu sancto per infinita secula amen, deo propitio pontificatus domno nostroⁿ⁾ in apostolica sacratissima beati Petri sede tertio atque domni Caroli excellentissimi regis Francorum et Langobardorum et patricii Romanorum, a quo coepit Italiam, anno XXV., indiction. VI.

Source Fulltext: Salzburger Urkundenbuch, II. Band, Urkunden von 790 bis 1199. Willibald Hauthaler und Franz Martin. S. 2-4.