In nomine sanctae et individuae trinitatis. Hludouuicus divina favente gratia rex. Decet regiam dignitatem parentum suorum pie facta non solum inviolabiliter conservare sed etiam censurae suae auctoritate alacriter confirmare. Idcirco notum sit omnibus fidelibus sanctae dei ecclesiae nostrisque praesentibus scilicet et futuris, quia vir venerabilis Liuprammus sanctae Iuuauensis ecclesiae archiepiscopus, quae est constructa in honore sancti Petri principis apostolorum, ubi etiam sanctus Hruotbertus confessor Christi corpore requiescit, obtulit excellentiae nostrae quandam auctoritatem confirmationis domni et genitoris nostri Hludouuici, praestantissimi imperatoris, in qua continebatur insertum, qualiter per eandem auctoritatem confirmasset eidem venerabili sedi omnes res, unde eo tempore iuste vestita esse videbatur tam ex liberalitate ducum vel etiam aliorum bonorum hominum largitate, necnon et ea, quae divae memoriae avus noster Karolus imperator per sua praecepta ibidem contulerat, necnon et quod idem domnus et genitor noster ad ipsam sedem confirmaverat, vel etiam undecumque legitima largitate ad ipsam ecclesiam pervenerat, tam monasteria virorum quamque et puellarum sive etiam ceteras res, ut absque alicuius contrarietate aut contradictione rectores et ministri memoratae sedis quiete et secure omni tempore tenere et dominare valerent, obsecrans clementiam nostram, ut paternae auctoritati firmitatis gratia nostram quoque superadderemus auctoritatem. Cuius petitioni ob amorem dei et reverentiam ipsius sancti loci libenter annuimus et hanc nostrae auctoritatis confirmationem circa ipsam sedem eiusque praelatos fieri decrevimus, per quam praecipimus atque iubemus, ut sicut superius conpraehensum est, omnes res eidem sedi tam ex liberalitate ducum quamque et aliorum hominum vel etiam avi nostri sive domni ac genitoris nostri confirmatione iuste et legaliter pertinere videntur tam monasteria virorum quamque et puellarum vel ceteras res ibidem, ut diximus, iuste aspicientes rectores et ministri praedictae matris ecclesiae absque ullius cuiuslibet inpedimento omni tempore iure legitimo teneant atque possideant, et nullus quilibet exinde quicquam aufferre aut abstrahere ullo umquam tempore praesumat, sed sicut a praedictis piis principibus constat esse conlatum et a nobis per hanc auctoritatem confirmatum, ita omni tempore inviolabiliter permanere valeat. Et ut haec auctoritas confirmationis nostrae firmior habeatur et a fidelibus et a fidelibus^a) nostris verius credatur et diligentius conservetur, manu propria subter firmavimus et anuli nostri inpressione signari iussimus.||
Signum (MF) Hludouuici gloriosissimi regis. ||
C. Adalleodus diaconus ad vicem Grimaldi recognovi et subscripsi (NT.)||
Data VI kal. mart., anno Christo propitio quarto regni domni Hludouuici regis in orientali Francia, indictione XV; actum Otingas palatio regio; in dei nomine feliciter amen.

Source Fulltext: Salzburger Urkundenbuch, II. Band, Urkunden von 790 bis 1199. Willibald Hauthaler und Franz Martin. S 25-27.