In nomine sancte, et individue trinitatis. Altmannus dei gratia Tridentinus episcopus. Ex quo huius pontificalis sedis sublimitatem divina dispositione conscendimus, ecclesias pro posse nostro exaltare fovere et amplificare summopere^a) curavimus. Notum igitur esse volumus tam instantis quam sequentis temporis fidelibus, qualiter nos domino disponente defuncto nostro progenitore Odalscalco comite castrum quoddam Hohenburc nomine, quod ego post obitum eius possedi hereditario iure cum omnibus suis pertinentiis curtibus vicis et villis, ecclesiis et aliis utensilibus illuc rite aspicientibus, in mancipiis utrius^b) sexus, areis edificiis terris cultis et incultis, agris pratis campis pascuis silvis venationibus, aquis aquarumve decursibus, piscationibus molendinis viis et inviis, exitibus et reditibus, quesitis et inquirendis, cunctisque^c) aliis apendiciis que aliquomodo nominari possunt, beato Petro apostolorum principi et beato Rodberto episcopo et confessore in maiori ecclesia^d) Salzburgensi ad ius pontificale pro spe remunerationis eterne manu propria et Heinrici de Kaezze^c) cui eadem bona deleganda commisimus post egressum meum de huius mundi caligine perpetuali iure tradidimus et confirmavimus. Ministeriales quoque castri prefati, Godfridum videlicet et Odalricum cum consanguineis et familia et bonis eorum Willehalmum et filium eius et ceteros ministeriales illuc rite pertinentes cum omni proprietate prediis eorum et omni iure quod illi videbantur possidere, eidem ecclesie post mortem meam perpetualiter habendos tradidimus et corroboravimus ea conditione interposita, ut ministerialium iure inibi vivant et Salzburgensibus archiepiscopis ad honorem et utilitatem ecclesie debitam fidelitatem exhibeant. Ut autem hec nostre donationis confirmatio presenti ac futuro tempore firma consistat, hoc privilegium inde conscriptum sigillo nostro insigniri iussimus. Si qui vero temerarii et deo rebelles viri pretaxata bona violenter invaserint et ausu nefario disturbare presumpserint, auctoritate dei omnipotentis patris et filii et spiritus sancti formidoloso anathematis vinculo usque ad condignam satisfactionem conscripti^g) permaneant. Hec autem acta sunt presente et suscipiente hoc^h) reverendo archiepiscopo Chonradoⁱ⁾ et astantibus simul et astipulantibus venerabilibus fratribus Balderico videlicet abbate, Gebenone preposito, Hugone preposito, Gerhoho preposito, Gummaro Pabone Heinrico Ottone Liutoldo Lamberto Rodberto^k) Leone et universis eiusdem Salzburgensis ecclesie canonicis et aliis quam pluribus probis et honestis clericis et laicis subscriptis, Heinrico videlicet de Kazze^l), Meingoto de Sureberch^m), Adelberone de Dietrammingen,' Liutoldo de Siesdorf, Wisent de Bonegowe et Otto cognatus eiusⁿ⁾ et aliis quam pluribus eiusdem ecclesie^o) ministerialibus.||
Acta autem sunt hec in Salzburgensi ecclesia anno ab incarnatione domini MCXLII^p), indictione V; feliciter amen.

Source Fulltext: Salzburger Urkundenbuch, II. Band, Urkunden von 790 bis 1199. Willibald Hauthaler und Franz Martin. S 303-304.