Alexander episcopus servus servorum dei venerabilibus fratribus episcopis et dilectis filiis abbatibus^a) et universis ecclesiarum prelatis per Salzburgensem provinciam constitutis salutem et apostolicam benedictionem. Ad omnes ecclesie filios aciem considerationis extendere suscepti pontificatus auctoritas^b) cui licet immeriti superni^c) muneris beneficio presidemus, monet nos propensius et hortatur, ut qui ad omnes vocabulum sumus paternitatis adepti, effectu paterno, quantum gratia divina concesserit, universos et singulos amplectamur. Cum autem per nos ipsos pre longa terrarum intercapedine et aliis multiplicibus obsistentibus causis visitare illos, qui procul sunt a sede apostolica, non valeamus, eis nostras debemus vices committere, de quorum fide simus et prudentia certiores et qui tanto frequentius et utilius, que ad salutem fidelium pertinent, subministrent, quanto necessitates eorum et defectum e vicino possunt plenius intueri. Inde utique fuit, quod experti constantiam fidei venerabilis fratris nostri archiepiscopi vestri, apostolice sedis legati, in provincia vestra et prius in aliis officium legationis commisimus, qui sicut eum decuit de profectu ecclesiarum et salute fidelium cogitavit. Verum ad apostolicam novissime sedem accedens sua nobis insinuatione monstravit, quod cum vobis tamquam gregi proprio teneatur et provincia vestra dumtaxat esse volebat, officio legationis contentus plus prodesse desiderans^d) quam preesse. Nos itaque zelum^e) ipsius sollicita consideratione pensantes in prescripta provincia officium legationis commisimus, ut vice nostra evellat et destruat, que destruenda cognoverit, et edificet et plantet, que domino viderit instruente plantandi. Quocirca universitatem vestram per apostolica scripta monemus atque precipimus, quatinus prefatum archiepiscopum sicut legatum sedis apostolice pro beati Petri et nostra reverentia honoretis et monitis mandatis ac statutis eius salubribus pareatis, ita quod per studium et instantiam suam ecclesie vestre canonicis proficiat institutis et spiritualibus auctore domino profectibus augeatur. Dat. Lateran. XIII kal. madii^f).

Source Fulltext: Salzburger Urkundenbuch, II. Band, Urkunden von 790 bis 1199. Willibald Hauthaler und Franz Martin. S 580-581.