+ ++ In nomine sancte et individue trinitatis amen. ++ Eberhardus dei gratia Salzburgensis archiepiscopus, apostolice sedis legatus, in perpetuum. Quoniam brevi cursu dierum hominis persuadente actus dignos memoria sepe rabies oblivionis obnubilat, cautum est et insapientibus conmendabile, ut contractus utiles ob tenatiorem memoriam litterarum apicibus affigantur. Notum igitur esse volumus tam presentibus quam etiam nascituris in posterum, quod, cum inter Chunradum archidiaconum de Volchenmarcht et dominum Vlricum abbatem sancti Pauli questio verteretur super tribus cappellis Gorensch inferiore et ecclesia sancti Cholomanni et capella sancte Marie in Pasters et super reconpensatione decimarum de quibusdam agris, quos iuxta forum Volchenmarcht iam dictus abbas in areas et domos redegerat, cum multa fuissent hinc inde diversis vicibus ab utraque parte proposita, tandem de prudentum virorum consilio et canonico consensu partium super totius amputatione litigii fuit in arbitros conpromissum. Cum itaque arbitri dei timore pre oculis habito inquisitis diligenter cause meritis negocii veritatem agnoscerent, uno ore et consensu unanimi tale promulgaverunt arbitrium, quod abbas cum sui consensu capituli tres areas et partem orti ecclesie sancti Rvdberti conferret libere et archidiaconus decimis, quas de residius petebat areis, nec non et iuri, quod in supradictis cappellis habere videbatur vel habuit, omnino renuntiaret. Monasterium etiam sancti Pauli domum in cimiterio sancti Rvdberti simul cum fundo cum perpetua tranquillitate et sine inquietatione possideat. Hanc itaque conpositionem rationabiliter factam et a partibus receptam utriusque partis petitione inducti in scriptum redigi et sigilli nostri appensione roborari fecimus nomina testium, qui presentes aderant, apponendo: Heinricus plebanus de Tinach, Bernhardus plebanus de Gurschiz, Gerwicus, Gotfridus, Bernhardus sacerdotes de Volchenmarcht, magister Abel, magister Albertus, Chunradus, Albero, Alwardus, Rvdgerus monachi sancti Pauli, milites de Ramensteine, Chunradus, Ekebertus, Siuridus, Hertwicus, Uolmarus, Chunradus, Heinricus de Tovchendorf, Reinhardus, Berhtoldus de Loschental, Leonhardus et alii quam plures testes. Acta sunt hec aput Volchenmarcht, anno domini M°CC°X0III°, III° kal. decembris. Dat. Frisaci per manum magistri Bernhardi notarii; in nomine domini feliciter amen. ||
S.^a)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 173-174.