Reverendo in Christo domino suo et patri E(berhardo) sancte Salzburgensis ecclesie archiepiscopo, a(postolice) s(edis) l(egato), R(udigerus) dei gratia Kiemensis episcopus, B(erhtoldus) abbas in Reittnhaselah, W(ichardus) prepositus in Ranshoven, obedientie orationis et obsequii debitam in Christo reverentiam. Sanctitati vestre significamus, quod cum nos causam, que vertebatur inter capitulum Salzburgense et dominum C(hunonem) de Gv/otrat super domo iuxta hospitale canonicorum in Salzburc sitam et quibusdam novalibus, sicut ex mandato apostolico acceperamus, terminare volentes partes peremptorie citassemus, dictus dominus C(huno) die peremptorio nec conparuit nec responsalem misit. Quem cum de iure pro contumacia excommunicationis sententia ferire debuissemus, nos honestati sue deferentes ex gratia pepercimus eidem, prefato vero capitulo sicut debuimus possessionem predictorum per sententiam adiudicavimus dando executores, qui idem capitulum * in predictam possessionem mitterent rei gratia conservande. Qui cum in possessionem prenominate domus capitulum misissent et in novalibus quoque mandatum nostrum exequi voluissent, obvium habuerunt dominum C(hunonem) cum suo comitatu, qui negotio ipsorum verbis conminatoriis in res et personas ulterius procedere prohibuit. Quapropter executores sicut nos ipsis dederamus in mandatis videlicet, ut omnes contradictores mandati nostri per cen(suram) ecclesiasticam coercerent, eundem C(hunonem) et omnes in hac parte sibi facientes excommunicationis sententia innodarunt. Vestre igitur sanctitati id ipsum significare necessarium duximus, ut cum vobis conparuerit tamquam excommunicatum eum noveritis arcius evitandum.||
SD. SD. S.^a)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 212.