+ In nomine sancte et individue trinitatis. Eberhardus dei gratia Salzburgensis archiepiscopus, apostolice sedis legatus, in perpetuum. Notum facimus tam presentibus quam futuris, quod Eberhardus comes illustris de Dornberch considerans, sicut debuit, quod pie donata in partem lucrorum cedere censeantur, omnia sua bona castrum videlicet Dornberch universam eius familiam omnesque possessiones, quibus tam paterno quam materno iure successerat, et alia ad hec pertinentia preter villam, que dicitur Rospach, de uxoris sue consensu comitisse Sophie sine contradictione qualibet ecclesie tradidit Salzburgensi nobis assignans in continenti vice ipsius ecclesie castri medietatem tam iure proprietario quam possessorio, reliquam vero partem castri resignatione totaliter in manus nostras prius facta titulo feodali a nobis postmodum assumendo. Ob hanc ergo traditionis gratiam, quam ecclesie fecerat, nos de nostri consilio capituli consensuque ministerialium nostrorum super hoc diligentius requisito redditus XX^ti librarum Salzburgensis monete comiti ut, illis uteretur quoad viveret, contulimus antedicto, post obitum autem ipsius illi redditus sicut et alia quelibet ecclesie Salzburgensi cederent absolute promittentesque nichilominus ipsi comitisse, ut post obitum comitis omnes possessiones excepto castro Dornberch obligatas tamdiu retineat quousque CCC^tas libras Ratisponensium ei, sicut inter nos conventum fuerat, solveremus. Sane cum is contractus sic deductus esset aliquanto tempore, tandem inter nos et comitem super forma predicti contractus lis orta est comite simul cum comitissa firmiter asserente, quod non obstante donatione, quam ipse comes ecclesie Salzpurgensi de predictis fecerat, comitissa uxor eius, licet id nos inficiaremur, penitus omnes possessiones ipsius comitis tenere deberet quoad viveret et insuper ipsius comitis familia ei sicut et viro suo liberius deservire. Cum ergo super hiis hinc inde aliquotiens verteretur questio, hoc inter nos tandem et ipsos intervenit denuo conpositio, ut XX^ti libris, quas comiti prius assignavimus alias X in redditibus ei quamdiu viveret adderemus, comitisse vere post mortem ipsius comitis ad CCC^tas libras denariorum sicut premisimus iungere deberemus alias C^tum et hac ei soluta pecunia nec de possessionibus, ne de aliquibus aliis se intromittat ulterius contractu per totum in suo robore, sicut predictum est, firmiter permanente. Preterea ipse comes redditibus tam novis quam antiquis apud se retentis castro tantum supradicto de consensu uxoris sue simpliter abrenuntians [non] tamquam verus dominus, sed tamquam castellanus ad custodiam castri cooperando fideliter aream, in qua nunc est, sibi retinuit ad standum ibidem et nos ipsius familiam in hoc honoravimus, ut omnes ammodo de militari prosapia inter nostros nomine et iure ministerialium censeantur. Ne igitur id, quod a nobis factum est, aliqua in posterum calumpnia perturbari valeat, presentem paginam ad instantiam ipsius comitis conscribi conscriptamque utriusque sigillo nostro videlicet et suo fecimus insigniri. Testes: Hainricus, Wernhardus fratres de Schovnberch, Otto iunior de Libenze, Ekkardus de Tanne, Chunradus de Chalhaim, Gerhohus de Perchaim, Albertus de Levbranschirchen, Gotscalcus et Reinholdus de Pvhel, Otto de Keueringe, Magens volpe, Dietricus de Pillina, Reinwardus et Heinricus de Niwenchirchen, Heinricus de Prunninge, Vlricus Grvnowe, Heinricus de Tanne, Hainricus de Tanpach, Eberhardus de Wenge, Eberhardus de Eberhartinge, Hartmannus de Hunoltesholze, Gotscalcus Swalwe, Engelbertus de Sikinge, Albertus de Levterkhoven, Hainricus de Spritach, Chunradus et Heinricus de Chazpach, Chunradus plebanus de Muldorf et alii quam plures.||
Acta sunt hec in castro Dornberch, anno domini M°CC°XXIII°, duodecimo kalend. novembris, indictione XII^a.

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 310-312.