Honorius episcopus servus servorum dei venerabili fratri . . episcopo Frisingensi et dilectis filiis . . de Salem et . . de Sancta Cruce abbatibus Constantiensis et Patauiensis diocesum salutem et apostolicam benedictionem. Venerabilis frater noster . . Salzeburgensis archiepiscopus olim provide cogitans, quod cum haberet diocesim valde diffusam, non sufficeret universis habitantibus in eadem pastorali sollicitudine imminere, vidensque, quod messis quidem multa, operarii vero pauci, rogavit dominum messis, ut illuc operarios destinaret, quia primo a felicis memorie I(nnocentio) papa predecessore nostro postulavit instanter et tandem obtinuit novum episcopatum in ecclesia Chimensi creari.¹⁾ Postmodum quoque iam sentiens, quod onus divisum in plures facilius sustinetur, post validam precum instantiam et deliberationem a nobis prehabitam diligentem impetravit Sechouiensem ecclesiam fieri cathedralem.²⁾ Deinde vero considerans, quod commissi sibi gregis dominici multitudo adhuc indiget alterius cura pastoris, cum ipse propter viarum pericula vix valeat totam diocesim visitare, apud nos oportune institit importune, ut in ecclesia sancti Andree de Lauent, in qua cum ministraret unus presbiter secularis, in ea prepositum et conventum regularium noviter ordinavit, episcopalem sedem instituere dignaremur. Sed nos rei circumstantias nescientes, utrum videlicet Salzeburgensis ecclesie capituli et prepositi et conventus sancti Andree ad id assensus accederet et an id Salzeburgensi ecclesie expediret, vel ecclesia sancti Andree servaretur indempnis, et ignorantes provisionem et diocesim futuro episcopo assignandas, eiusdem archiepiscopi precibus tunc non duximus annuendum. Nuper autem per suas nobis litteras intimavit, quod paratus erat futuro episcopo unam dietam et dimidiam in diocesi assignare, cui trecentas marcas in annuis redditibus deputavit, post obtentam a nobis super hoc licentiam assi¬gnandas. Dictum quoque Salzeburgense capitulum nec non prepositus et conventus sancti Andree se id acceptare transmissis ad nos litteris profitentur. Quare supradictus archiepiscopus preces supplices inculcavit, ut id dignaremur perducere ad effectum. Volentes igitur adhuc in tanto negotio cum debita maturitate procedere, discretioni vestre per apostolica scripta mandamus, quatinus inquirentes super hiis omnibus diligentius veritatem, si ea inveneritis, sicut superius sunt expressa, et specialiter si predictorum capituli, prepositi et conventus ad id assensus accesserit, memorato archiepiscopo in predicta ecclesia sancti Andree instituendi episcopalem sedem tribuatis auctoritate apostolica facultatem, reservatis per omnia privilegiis et honoribus archiepiscopo et ecclesie Salzeburgensi, sicut in duobus aliis episcopatibus sunt servata, prout in nostro et felicis recordationis I(nnocentii) pape predecessoris nostri rescriptis plenius continetur. Quod si non omnes hiis exequendis potueritis interesse, tu frater episcope cum eorum altero ea nichilominus exequaris. Dat. Reate, VIII kal. aug, pontificatus nostri anno nono.||
B.^a)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S.329-330.