Meinhardus dei gratia comes de Gorze, advocatus ecclesie Aquilegensis, presenti scripto notum facimus universis, quod nos domno E(berhardo) venerabili Salzburgensi archiepiscopo et ecclesie sue contulimus libere et pleno iure proprietatem omni questione carentem et possessionem predii Predmarsdorf, quod ecclesia Polen^a) olim habuit circa Veldesberch, quod nos emeramus ab eadem cum attinenciis et usibus universis tam in montibus quam vallibus pascuis et pratis quesitis et non quesitis et aliis omnibus quocumque nomine censeantur recipimusque idem predium in recto feudo a manu predicti archiepiscopi. Pro quo tractatu iam dictus dominus archiepiscopus nobis promisit se daturum denariorum Frisacensium legalium marcas CC^tas et in festo beati Michahelis proximo venturo solucio dicte pecunie fiet nobis vel, si, quod absit, nos non superesse contingeret, heredibus nostris aut alii, cui legaverimus ipsam summam, ita quidem, quod, si solutio istius pecunie neglecta fuerit, per dominum archiepiscopum quocumque casu in termino supradicto domini nostri Lauendinensis episcopus, Sekowensis electus et amici nostri Rudgerus de Salvelden, Chunradus de Vager, Gerhochus de Salzburch ministeriales ecclesie Salzburgensis Frisacum intrabunt, inde nunquam nisi de nostra speciali licencia egressuri, donec tota pecunia nobis sit soluta. Qui etiam si pactum forsan de intrando Frisacum casu aliquo non attendentes ob suam negligenciam non intrarent, nos nichilominus dictam summam a prenominato domino archiepiscopo vel suo successore requiremus. Ut autem hec tam aput nos quam aput heredes nostros firma consistant, presentem cartam super hiis conscriptam sigillo nostro mandavimus roborari. Testes sunt: Otto Burgona de Spengenberch, Wlricus de Rifenberch, Heinricus purcravius de Lunz, Heinricus et Fridericus de Gesize, Folkerus de Flachsperch et alii quam plures.||
S.^b)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S.415-416.