Excellentibus et magnificis principibus dominis Ludwico et Heinrico illustribus comitibus palatinis Reni duoibus Bawarie et ingenuis ac spectabilibus viris dominis Meinhardo et Alberto comitibus Goricie ac Tyrol. F(ridericus) dei gracia sancte Salzburgensis ecclesie archiepiscopus apostolice sedis legatus sinceram ad eorum beneplacita voluntatem. Sollicitudo pastoralis officii, que non nostris meritis, sed magnifica dei providentia nobis incumbit, nec non validus clamor venerabilium fratrum coepiscoporum nostrorum prelatorum et cleri vestrorum districtuum in nostro novissime congregatorum concilio et quorundam post idem habitum concilium officium et auxilium nostrum invocantium nos excitat stimulat et perurget, ut eorum afflictionibus multimodis angariis et perangariis infinitis, quas a vestris et terrarum vestrarum nobilibus plerisque iudicibus et preconibus indebite paciuntur, ad sincere compassionis beneficium et debite consolacionis auxilium diligenti paterne affectionis promptitudine assurgamus, presertim cum iidem venerabiles prelati et cleri universitas terrarum vestrarum et etiam aliorum sollempniter et aperte per unum de nostris confratribus episcopis in pleno concilii nostri consistorio et etiam post concilium nobis proponendum et exponendum duxerint querulosis vocibus et oculis lacrimosis, quod tot et tantis afficiuntur oneribus servitutis et contra libertatem ecclesiasticam et honestatem Christianorum principum adeo deprimuntur, quod tempore Pharaonis melior videbatur esse condicio sacerdotum et licet a mandato vestro tanquam a magnificis principibus et dominis Christianis tales et tante lesionum insolentie et aliarum turbacionum frequentes malicie non procedant sicut credimus et speramus tamen, quia culpam facientis habet, qui quod preter corrigere negligit emendare, et error, cui non resistitur, approbatur et secundum apostoluni facientes et consentientes pena sunt simili puniendi. [< Rom. 1,32] Nobilitatem vestram devote requirimus et rogamus, quatenus illius intuitu et respectu, qui laudem bonorum et vindictani maloram vestre nobilitati dedit gladii potestatem dare curetis opem et operam efficacem, ut emendatis primo et principaliter emendandis in vobis ipsis terrarum vestrarum magnatus nobiles iudices et precones et quilibet alii quocumque nomine censeantur personarum et rerum ecclesiasticarum illiciti invasores lesis personis et ecclesiis satisfaciant, ut tenentur et ab earum lesione abstineant in futurum, alioquin contra facientes et consencientes eisdem divinum nos invocare iudicium et auxilium instancius et devocius oportebit et in penas eorundem censuram ecclesiasticam severius exercere, quamvis eminencie vestrarum personarum quantum unquam cum deo possumus libenti animo deferamus. Et ad expressum consensum presentis monicionis venerabiles fratres suffraganei nostri sigilla sua unâ cum nostro presentibus appenderunt. Dat. Salzburge anno domini millesimo CC^moLXXX^mo tercio, idus marcii.||
S.^a) S. S. SD. S. S. S.

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 129-130.