Wir Ru/odolf von gotes gnaden romischer chunich und alle zit ein merær des reiches tu/on chunt allen den, die disen brief sehent oder geho/ernt lesen, daz wir dise ordenunge und dise satzunge han gesat und gemacht zwischen dem erzpischolf von Salzburch von ainer sit und dem herzogen Heinrichen von Baiern von der andern seit, unseren lieben fursten mit ir baider willen und wizzunde in dise weise: (1.) Der erzpischolf von Salzburch und herzog Heinrich von Baiern habent baide ir triwe gegeben in unser hant in aides weise, daz si bede dise su/one, dise ordenunge und disen satz stæt haben mit ganzen triwen an alle arge liste als her nah gescriben stat. Und swelher under in zwaine dise su/one brichet oder ihtsiht wider dise ordenunge oder disen satz tu/ot, der sol von sinem reht gevallen sin und schullen wir dem helfen, der di su/one stæt habet und schullen wider den sein, der si briht. (2.) Der herzog Heinrich von Baiern hat Muldorf mit allem dem, daz darzu/o geho/ert und des er den erzpischolf entwert hat, in unser hant geantwrtet, alle bænne, di getan sint, si sin verdient oder unverdient, sullen ab sin. (3.) Man sol auch die handveste und die riehtunge^a) und die su/one, di pischof .Friederich von Salzburch und der hertzog Heinrich von Bayern mit enander gemaht haben und anander gegeben habent, an allen dingen stæt halten, und swa daz nit volfueret ist, da sol man ez noh volfueren als ez an der handvest geschriben stat. (4.) Umb niderlegunge an saltz und andern dingen und umb strazze und umb wêg auf lande und auf wazzer und umb prukk und umb steg und umb chuppelwaide und holtz haben wir dise chuntschaft gegeben: Der ertzpischolf von Salzburch hat diese dri man genommen Chunraten von Wartenuels, Chu/onen von Gu/otrat, Chunraten von Aychaim und der hertzog Heinrich hat von sinen wegen genomen den von Abensperch, den von Hâls und den Taufchiricher. So haben wir gegeben den selben sechsen, di da vorgenannt sint, hern VIrichen von Toufers und hern Winharten von Rohrbach an eines ubermannes stât, und swie di sechs oder di zwên obman, ob di sechs misshellent, ervarnt auf ir aide, als ez ze viertzig iaren gestanden si, also sol ez auch noch stan und wesen, und swas an disem vorgenanten dingen sider genewet und geandert ist, daz sol man wider setzen, als ez vor bi viertzig iaren stu/ont. (5.) Der niwe weg, der gemacht ist durch Berichthersgadem sol ab sin, wan der hertzog von Osterrich spricht, im geschech unreht damit und der hertzog Hainrich von Baiern sprichet, im geschehe unreht damit und der heutige hertzog von Baiern sprichet, im geschehe unrecht da mit. (6.) Umbe Wildenekk ist es gesetzet also, wan der hertzog Hainrich sprichet, er hab sin den erzpischolf von Salzburch niht entwert. Swen der ertzpischolf von Salzburch umb Wildenekk an spricht, der sol im dar umb reht tu/on. (7.) Um Hohenstein haben wir ez also gesetzet, mu/egen mir daz mit minne niht gerihten, wan der ertzpischolf von Salzburch spricht, er hab es drizzich iar in rehter gwer dar braht und auch der hertzog Hainrich giht, er hab ez zehen iar und mêre in rehter gwer dar braht und si also baide iehent der gewer, so haben wir ez gemachet also, daz der von Toufers und der von Rorbach nehmen sullen ein chuntschaft als reht ist, daz ist, daz si zwaintzk man und ainen man erwern leute nemen sullen, und swem die alle gemainlich sagen auf ir aide oder siben unter denselben ain und zwaintzik mannen, daz er die rehten gwer hab her braht, der soll Hochenstein innehaben, und der in dar umbe anspriht, dem sol er reht davon tu/on. (8.) Umb Gastewen haben wir es also gesatzt: Der von Goldekk sol hertzogen Hainrichen setzzen in des gu/otes gwer, daz hertzog Hainrich vor inne hat und da si der von Goldekk entwert hat, umb daz ander, daz hertzog Hainrich giht, daz sein si und des der Goldekker lougnet, darumbe haben wir diseu chuntschaft gegeben, daz der erzpischolf von Salzburch dise dri man hat genomen hern Chunraten von Wartenuels, Chu/onen von Gu/otrat und Chunraten von Aychaim und hertzog Heinrich hat von sinen wegen genomen den von Abensperch, den von Hals und den von Toufchirichen. So haben wir gegeben denselben sechsen fu/er ainen uberman hern Vlrichen von Toufers und hern Winharten von Rorbach also, daz si baide schullen sin an aines ubermannes stat. Und swem di selbe chuntschaft gibt auf den aide, daz er reht hab, der sol daz gu/ot haben. (9.) Man sol ouch paidenthalben alle gevangen ledig lazzen und swas noh in pu/erigschaft stat, daz sol man ablazzen und ledig sin. Auch sol der pischolf von Salzburch aller der vreunt sin, di durch den hertzogen im icht getan habent in disem urleug. Auch sol der ertzog^b) Heinrich von Bayern aller der vriunt sin, di durch den pischolf von Salzburch in icht getan habent in disem urleug. (10.) Dar nach umb raub, um brant und umb allen schaden, (der)^c) sol ab sin. (11.) Man sol auch alle moutte und alle zo/elle, di auf dem lande und auf dem wazzer aufgesezzet sint nah pischolf Frideriches von Salzburch tode ablazzen, wan uns dunchet, daz si von hazze gesetzet sint paidenthalben. (12.) Diseu su/ene ist also gemachet, daz si dem pischolf von Salzburch noh sinem gestift noh dem hertzogen Hainrichen noch siner herschaft an andern ir rehten niht schaden sol. Dar nach sol dewederre dem andern gwalt noch unreht tu/on. (13.) Diu chuntschaft zervaren ist nomen ein tag an dem mæntag nah auzgenter pfhingestwochen ze Halle und sol alles daz geendet sin vor sande Johannesmesse ze der næchstin sunwenten, di nu chumpt, und mu/egent di sechsse wol daz zil lenger, ob si sehent auf ir aide, daz ehaft oder erbær sache den pischolf oder den hertzogen irrent an geværde. Und stirbet ainer unter den sechsen, so sol man ainen andern an sin stat nemen in den næchsten viertzehen tagen und stirbet der ubermanne dhainer, so sullen di sechse ainen andern nemen an desselben stat in den nehsten viertzehen tagen. (14.) Und daz ditzze (su/ene)^c) stæt si und unzerbrochen immer mer beleihe, so haben wir durich bet des vorgenanten pischolf von Salzburch und ertzog^b) Hainriches von Bayern unser insigel gehenchet an disen brief. (15). Wir ertzpischolf von Salzburch und wir hertzoge Heinrich von Bayern vergehen des, daz unser herre chunik Rudolf von gotes genaden Romischer chunich dise vorgenanten su/ene ordenunge und satz mit unserm willen gemacht hat und haben wir gelobt mit unsern triwen und aides weise und mit soliher pene, als da vor geschriben stat, daz wir diselben su/one, als da vor geschriben ist, stæt halten, und dar umbe haben wir unsern herren den vorgenanten chunik gebeten, daz er sin insigel hat gehenchet an disem brief. Darzu/o haben wir auch gehenchet paide unser insigel an diesen brief ze einem waren urchu/ende. Diser su/one zeug sint unser liebe fursten pischolf Heinrich von Basel, pischolf Heinrich von Regenspurch, pischolf Wernhard von Pazzaue, pischolf Hertnid von Gurkk, pischolf Chunrat von Chyemse, pischolf Chunrat von Lauent, hertzog Ludwich von Bayern, hertzog Albreht von O/esterrich, hertzog Meinhart von Chærnten und unser getriwe maister Hainrich von Chlingenberch, unser oberister scriber, Friderich der purchgrave von Nu/ernberch, grave Albreht von Aygerloch, grave Ludwig von O/eting, Ulrich von Toufers und ander unsers riches man. Dirre brief ist gegeben ze Auchspurch an unser frowen tag der li/ehtmesse, do von Christ gebu/ert warn tausent iar zwaihundert und sechs und ahtzgk iar, unsers riches an dem dreizehentisten iar.||
S.^d) SD. S. ^e)

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 157-159.