Honorius episcopus servus servorum dei venerabili fratri Salzpurgensi archiepiscopo salutem et apostolicam benedictionem. Iustis petentium desideriis dignum est nos facilem prebere cousensum et vota, que a rationis tramite non discordant, effectu prosequente complere. Significasti siquidem nobis, quod cum quidam abbates prepositi regulares tue provincie in ecclesiis baptismalibus et parrochialibus non plene pertinentibus ad eosdem instituissent contra Lateranensis statuta concilii monachos et canonicos regulares, qui viventes irregulariter multa illicita committebant in salutis sue dispendium, opprobrium ordinis et scandalum plurimorum, tu volens morbo huic congruum remedium adhibere de suffraganeorum tuorum ac aliorum virorum prudentum consilio in plena synodo provide ordinasti, ut abbates et prepositi regulares in talibus ecclesiis diocesanis episcopis presbyteros representent, qui eisdem episcopis de plebis cura respondeant, eis vero de rebus temporalibus rationem exhibeant competentem, prout in concilio Lateranensi statutum et nuper in generali extitit innovatum. Unde nobis humiliter supplicasti, ut hec apostolico dignaremur munimine roborare. Nos igitur tuis iustis precibus grato concurrentes assensu quod per te super hiis provide ac racionabiliter actum est, auctoritate apostolica confirmamus et presentis scripti patrocinio communimus. Nulli ergo omnino hominum liceat hanc paginam nostre confirmationis infringere vel ei ausu temerario contraire. Si quis autem hoc attemptare presumserit, in dignationem omnipotentis dei et beatorum Petri et Pauli apostolorum eius se noverit incursurum. Dat. Lateran. XVIII kal. ianuar., pontificatus nostri anno secundo.

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 165.