Ich Otte von Gu/etrat vergieh und tuen chunt allen den, die disen prief ansehent lesent oder ho/erent lesen, daz ich durch wierde und auch durch die fuderunge, deu ich unde, meine vodern von dem gotshaus ze Salzburch enphangen haben, und durch ein selgeret mein und meiner vodern allez mein aygen, daz ich in dem bistu/om ze Salzburch han an leuten oder an gu/et, an vesten an burgen oder an swen daz geligen machk^a), meinem herren erztzibischolf^a) Chunraten von Salzburch und seinem gotshaus ledichlich und willechlichen ouf gegeben han und hat er mier alle deu selben gift und aygenschaft, wan ez inwertsaigen des gotshaus ze Salzburch gewesen ist, mit allen meinen lehen, die ich von dem vorgenantem gotshaus ze Salzburch gehabt han, mier und meinem sun Hæinrichen oder swaz ich su/en gewinne, ze rehtem lehen verlihen. Wer aber daz, daz ich oder mein sun Hæinrich oder ander meine sune ob ich siu gewinne, an erben verfu/ern, so schol deuselbe lehenschaft allesampt an daz gotshaus ze Salzburch gevallen an alle chriege. Und daz deu sache stet beleihe, dar uber han ich ze æinem u/erchunde gegeben diser brief mit meinem insigel. Der brief ist geschriben und gegeben datz Pazzawe, do von Christes geburde ergangen warn tausent iar zwaihundert iar und in dem sehsten und neunzigisten iar, des nehsten tages nach sande Valenteines tage.||
S.^b)

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 223-224.